एजेन्सी – कोपा अमेरिका कप विजेता अर्जेन्टिनी स्टार मिडफिल्डर रोड्रिगो डि पउल ला लिगा च्याम्पियन एट्लेटिको म्याड्रिडमा अनुबन्धित भएका छन् ।

एट्लेटिकोले रोड्रिगोलाई इटालियन क्लब उडिनेसबाट ३० मिलियन पाउन्डमा ५ वर्षको लागि अनुबन्ध गर्न सफल भएको हो । सम्झौता अनुसार अर्जेन्टिनी स्टार रोड्रिगो सन् २०२६ सम्म एट्लेटिकोमा हुनेछन् । उनको राष्ट्र अर्जेन्टिनाले यसै साता ब्राजिललाई हराउँदै २८ वर्षपछि कोपा अमेरिका कप जितेको थियो ।

उनलाई अनुबन्ध गर्न इंग्लिस क्लब लिड्स युनाइटेडले पनि चासो देखाएको थियो । तर उनले वान्डा मेट्रोपोलिटानोको क्लब रोजेका हुन् । ला लिगा च्याम्पियन एट्लेटिकोमा यो सिजन अनुबन्ध हुने रोड्रिगो पहिलो खेलाडी बनेका छन् । अर्जेन्टिनी प्रशिक्षक डिएगो सिमिओनीले उनको प्रदर्शनलाई नजरअन्दाज गर्दै टोलीमा भित्र्याएको हो ।

उनको सोमबारै मेडिकल परिक्षण भइसकेको छ । एट्लेटिकोमा आबद्ध भएसँगै रोड्रिगोले च्याम्पियन टोलीमा आबद्ध हुन पाउदा खुशी रहेको र यो दायित्वप्रति सचेत रहेको बताउँदै यो आफ्नो खेल करियरको सबैभन्दा ठुलो चरण रहेको बताएका छन् ।

‘स्पेनी फुटबलमा मेरो अनुभवका कारण मलाई खेल्न सहज हुन सक्नेछ । म स्पेनमा खेल्ने सबै साथीहरुलाई राम्ररी बुझ्दछु,’ रोड्रिगोले भने, ‘म प्रशिक्षक सिमिओनको प्रशिक्षणमा खल्न पाउँदा धेरै खुसी छु । मलाई फुटबल मन पर्छ, यो मेरो जीवनको दैनिक भाग हो र खेलाडीको रुपमा प्रशिक्षक सिमिओनसँग जोडिन पाउँदा खुशी छु ।’

२७ वर्षीय रोड्रिगोले यसअघि दुई सिजन (२०१४–१५ र १५–१६) भ्यालेन्सियामा बिताएका थिए । त्यसपछि उनी उडिनेस पुगेका थिए । उनले उडिनेसेमा ५ सिजन बिताउँदा १८४ खेलमा ३४ गोल गरेका छन् ।

अर्जेन्टिनाका राष्ट्रिय टोलीका प्रशिक्षक लियोनेल स्कोलानीको प्रशिक्षणमा उनले लगातार मौका पाइरहेका छन् । उनले अर्जेन्टिनाबाट २८ खेलमा १ गोल गरेका छन् । उनी २०१८ देखि नियमित रुपमा अर्जेन्टिनी टोलीमा रहेका छन् ।