काठमाडौं (हाम्रो खेलकुद)

राष्ट्रिय फुटबल टोलीको कप्तानका रुपमा एएफसी सोलिडारिटी कपमा भाग लिन मलेसिया पुगेपछि अनिल गुरुङ पहिलो रोजाइमा पर्ने सम्भावना कम छ ।

कोचिङमा आज साँझ नेपालले आफ्नो पहिलो खेलमा लिस्टेसँग हुने खेलमा प्रतिस्पर्धा गर्दैछ । युवा खेलाडीले लगातार सफलता दिलाइरहेका कारण पनि टोलीमा सिनियर खेलाडीमध्येका एक अनिल सुरुआती ११ मा पर्ने सम्भावना कम छ ।

नेपालका पछिल्ला दुई सफलतामा स्ट्राइकरद्धय नवयुग श्रेष्ठ र विमल घर्तीमगरको जोडीले सफलता दिलाइरहेका कारण पनि अनिल पहिलो रोजाइमा पर्ने सम्भावना कम छ । माघमा बंगलादेशमा भएको बंगबन्धु गोल्डकप जित्दा होस् वा फागुनमा भारतमा सम्पन्न १२ औं दक्षिण एसियाली खेलकुदको यू २३ फुटबलमा स्वर्ण पदक दिलाउँदा होस नवयुग र विमलको जोडी खुब चम्केको थियो ।

टोलीका अन्य खेलाडीले पनि अग्रपक्तिलाई सघाउन उत्तिकै महत्वपूर्ण भूमिका निर्वाह गरेका थिए । तीन दुवै सफलतामा अनिल थिएनन् । अनिल पहिलो रोजाइमा नपरे स्वतः टोलीको कप्तानी विराज महर्जनले सम्हाल्नेछन् । विराजकै नेतृत्वमा नेपालले बंगबन्धु र सागमा स्वर्ण जितेको थियो । टिमोर लिस्टेसँग पनि तीनै दुई स्ट्राइकर विमल र नवयुग पहिलो रोजाइमा पर्ने निश्चित प्राय छ । उनीहरुबाट अपेक्षा अनुसारको प्रदर्शन हुन सकेन भने राष्ट्रिय टोलीमा लामो अनुभव बोकेका अनिलले खेलका बीचमा मौका पाउन सक्छन् ।

लिस्टेविरुद्ध रक्षापक्तिमा विराज, रविन जस्ता सिनियर खेलाडी अनन्त तामाङ र आदित्य चौधरीको साथ रहनेछ । सुजल श्रेष्ठ, विक्रम लामा र अन्जन विष्ट मिडफिल्डमा खेल्ने लगभग निश्चित छ । विशाल राई पूर्ण रुपमा फिट नभएकाले उनको ठाँउमा हेमन गुरुङले खेल्ने सम्भावना छ । लामो समय राष्ट्रिय टोलीको पोष्ट सम्हालेका किरण चेम्जोङ र पछिल्ला दुई ठूला सफलतामा टोलीको हिस्सा रहेका विकेश कुथुमध्ये एक टिमोर लिस्टेविरुद्ध खेल्नेछन् । यी दुईको दाँजोमा विशाल श्रेष्ठसँग राष्ट्रिय टोलीको कम अनुभव छ ।