एजेन्सी – एसी मिलानले सिरि एको कम्तीमा दुई राउन्डका खेल याल्टान इब्राहिमोभिच विनानै खेल्नु पर्ने छ । मेमा युभेन्ट्सविरुद्ध खेल्दा स्विडिस फरवार्डको घुँडामा चोट लागेको थियो । घुँडाको शल्यक्रियापछि पनि केहि समस्या देखिएको छ । त्यसैले उनले कम्तीमा अन्तर्राष्ट्रिय विश्राम पछि मात्र पूनरागमन गर्ने अपेक्षा गरिएको छ ।

‘शारीरिक रुपमा उनी ठिक अवस्थामा छन् । यद्दपी उनले टोलीका अन्य खेलाडीसँग अभ्यास गरेका छैनन्,’ मिलानका प्रशिक्षक स्टेफानो पिओलीले भने छन्, ‘अर्को साता उनका लागि महत्वपूर्ण हुनेछ । उनले सामान्य रुपमा आफ्नो लयमा अभ्यास र बलसँग खेल्नेछन् । सबै सोचे जस्तै भयो भने अन्तर्राष्ट्रिय विश्राम पछि उनी फर्कन सक्छन् ।’

मिलानमा उनको भूमिका महत्वपूर्ण रहँदै आएको छ । ‘टोलीमा उनको भूमिका अतुलनीय छ र उनी प्राविधिक रुपमा पनि नेता हुन्,’ प्रशिक्षक पिओलीले थपे, ‘मानसिक रुपमा पनि उनी ठिक छन् । उनलाई थाहा छ उनी टोलीका लागि निर्णायक हुन सक्छन् ।’ इब्राहिमोभिच अक्टुबर ३ मा ४० वर्ष लाग्दैछन् । त्यसैदिन टोलीले लाजियोको सामना गर्नेछ । अन्तर्राष्ट्रिय विश्रामको लगत्तै टोलीले युभेन्ट्सको सामना गर्नेछ ।

इब्राहिमोभिचविना मिलानले सिरि एमा विजयी सुरुवात गरेको छ । घरेलु टोली साम्पडोरियामाथि सोमबार १–० को जित दर्ता गर्दै मिलानले नयाँ सिजन जितका साथ सुरुवात गरेको हो ।