काठमाडौं (हाम्रो खेलकुद)– आयोजक त्रिभुवन आर्मी क्लबलाई हराउँदै मध्यमाञ्चल प्रधानसेनापति चौथो अन्तर्राष्ट्रिय महिला फुटबल प्रतियोगिताको फाइनलमा पुगेको छ ।
Photo credit: Ekantipur
गत बर्ष फाइनल खेलेको आर्मीलाई यसपटक सोमबार भएको सेमिफाइनलमा मध्यमाञ्चलले टाइब्रेकरमा ३–१ ले हरायो । अब मध्यमाञ्चलले उपाधिका लागि बुधबार साबिक विजेता एपिएफसँग प्रतिस्पर्धा गर्नेछ । अर्को सेमिफाइनलमा एपिएफले अर्को विभागिय टोलीलाई नेपाल पुलिस क्लबलाई ३–१ ले हराउँदै उपाधि रक्षाको सम्भावनालाई बढाएको छ । मध्यमाञ्चलले निर्धारित समयमै आर्मीमाथि जित नजिक पुगेको थियो । तर, अन्तिम समयमा आर्मीले गोल फर्काउदै खेललाई २–२ को बराबरी गरेको थियो ।
आर्मीकी कप्तान अञ्जली वाइबाले ९० औं मिनेटमा गोल खेललाई बराबरीमा पुयाएकी थिइन् । ३२ औं मिनेटमा शर्मिला थापा मगरको गोलबाट आर्मीले अग्रता लिएको थियो । मध्यमाञ्चलकी सुस्मिता घिसिङले ४२ औं मिनेटमा बराबरी गोल फर्काइन् । अन्जुको गोलबाट मध्यमाञ्चलले ६३ औं मिनेटमा खेलमा अग्रता लियो । टाइब्रेकरमा मध्यमाञ्चलकी निशा ठकुरी, अञ्जु लोप्चन र मनीषा राउतले गोल गरे । आर्मीबाट कृष्णा खत्रीले मात्र गोल गरिन् ।
अर्को खेलमा साबिक विजेता एपिएफका लागि सरु लिम्बुले आठौं, गीता रानामगर ४८ औं र साबित्री भण्डारीले इन्जुरी समयको पहिलो मिनेटमा गोल गरेका थिए । पुलिसका लागि निरु थापाले एक गोल फर्काइन् ।
