एजेन्सी – अर्जेन्टिनी फरवार्ड लिओनेल मेस्सीले बार्सिलोना छाडेपछि खाली भएको जर्सी नम्बर १० क्लबकै एकेडेमी ला मासियाबाट आएका युवा विंगर अन्सु फातीले लगाउने भएका छन् ।

बार्सिलोनाले सामाजिक संजालमा भिडियो राख्दै फातीले १० नम्बर जर्सी लगाउने पक्का गरेको हो । स्पेनिस राष्ट्रिय टोलीबाट समेत खेलिसकेका फाती गत साताबाट मात्र अन्य खेलाडीसँग प्रशिक्षणमा सामेल भएका थिए । चोटबाट मुक्त भएपछि १८ वर्षीय उनी पूनरागमनको अन्तिम तयारीका क्रममा रहेका छन् ।

घुँडाको चोटका कारण उनी झन्डै ८ महिनादेखि मैदान बाहिर रहँदै आएका छन् । बार्सिलोनाले फाती सेप्टेम्बरको मध्यसम्ममा मैदान फर्कने अपेक्षा गरेको छ । योजना अनुसार भएमा अन्तर्राष्ट्रिय विश्रामपछि उनी मैदान फर्कनेछन् । यदि त्यस्तो भएको खण्डमा सेभिल्लाविरुद्धको खेलका लागि उनी उपलब्ध हुनेछन् ।

सन् २०२० को नोभेम्बरमा बायाँ घुँडामा चोट लागेपछि उपचार र रिह्याबका क्रममा पटक पटक उनलाई पुनरागमनमा समस्या भएको थियो । तर, अब भने उनी पूनरामगनको तयारीमा देखिन्छन् । यद्दपी पूर्ण रुपमा ठीक नभएसम्म बार्सिलोना जोखिम उठाउने पक्षमा देखिदैन ।

अगष्टको सुरुवातबाटै उनी एक्लै अभ्यासमा फर्केका थिए । अहिले भने उनी टोलीका अन्य खेलाडीका साथ अभ्यास गर्नका लागि तयार भएका छन् । फाती उच्च लयमा खेलिरहँदा घाइते हुन पुगेका थिए । त्यसको असर बार्सिलोनाको नतिजामा पनि परेको थियो । चोटकै कारण उनले युरोपेली च्याम्पियनसिप र टोकियो २०२० ओलम्पिक पनि गुमाएका थिए ।

यो पनि : मेस्सी र रोनाल्डोदेखि केन र एम्बापपेसम्म : यस्तो रहयो समग्रमा ट्रान्सफर विन्डो