एजेन्सी – इजिप्टका मोहम्मद सलाहले इंग्लिस प्रिमियर लिगमा १ सय गोल पुरा गरेको खेलमा लिभरपुलले सहज जित हात पारेको छ । लिभरपुलले घरेलु टोली लिड्स युनाइटेडमाथि ३–० को सहज जित निकालेको हो ।

एल्लान रोड वेस्ट योर्कसायर लिड्समा आइतबार राति भएको खेलमा लिभरपुलको सहज जितमा मोहम्मद सलाह, फविन्हो र साडियो मानेले गोल गरे । पहिलो हाफमा एक तथा दोस्रो हाफमा दुई गोल भएको थियो ।

खेलको २०औं मिनेटमा मोहम्मद सलाहले गोल गर्दै लिभरपुललाई अग्रता दिलाए । उनले ट्रेन्ट एलेसान्दर अर्नाेल्डको पासमा गोल गरेका थिए । यो गोलसँगै सलाहले इंग्लिस प्रिमियर लिगमा १ सय गोल पुरा गरेका छन् । उनले लिभरपुलबाट ९८ तथा चेल्सीबाट दुई गोल गरेका छन् । यस्तै उनी अफ्रिकी राष्ट्रबाट १ सय गोल पुरा गर्ने दोस्रो खेलाडी बनेका छन् ।

यसअघि आइभोरी कोस्टका डिडिएर ड्रोग्वाले १०४ गोल गरेका छन् । सलाहले प्रिमियर लिगको १६३ खेलमा १ सय गोल र ३६ असिस्ट दिएका छन् । दुई पटक प्रिमियर लिग गोल्डेन बुट, एक प्लेयर अफ दि सिजन अवार्ड र एक प्लेयर अफ दि मन्थ अवार्ड जितेका छन् ।

५०औं मिनेटमा फाविन्होले गोल गर्दै लिभरपुलको अग्रता दोब्बर पारे । ६०औं मिनेटमा पास्कल स्ट्रजिक सिधै रातो कार्ड खाँदै मैदानबाट बाहिरिएपछि लिड्स थप समस्यामा पर्दा लिभरपुललाई खेलमा थप सहज बनेको थियो ।

पास्कलले हार्भे इलिओटलाई गम्भीर ट्याकल गरेका थिए । इन्ज्युरी समयको थप गरिएको दोस्रो मिनेटमा साडियो मानेले थियागो अलकान्तराको पासमा गोल गर्दै लिभरपुलाई सहज जित दिलाए ।

यो जितसँगै अपराजित रहेको लिभरपुलले शीर्ष दुईमा रहेका म्यानचेस्टर युनाइटेड र चेल्सीसँगको अंक बराबरी गरेको छ । समान ४ खेलबाट समान १० अंक रहेपनि लिभरपुल गोलअन्तरमा तेस्रो स्थानमा रहेको छ । पराजित लिड्स २ अंक जोडेर १७औं स्थानमा रहेको छ ।