एजेन्सी – कप्तान इडेन हाजार्ड र रोमेलु लुकाकु बेल्जियमको राष्ट्रिय टोलीबाट बाहिरिएका छन् । युइएफए नेसन्स लिग अन्तरगतको सेमिफाइनलमा फ्रान्सविरुद्धको खेलमा चोट बोक्न पुगेपछि मुख्य खेलाडीद्धय हाजार्ड र लुकाकु राष्ट्रिय टोलीबाट बाहिरिएका हुन् ।

यससँगै हाजार्ड र लुकाकुले इटालीविरुद्ध तेस्रो स्थानको लागि आइतबार साँझ हुने खेल गुमाउनेछन् । खेल राति ६ः४५ बने इटालीमा हुनेछ । उपाधिका लागि आइतबार राति नै स्पेन र फ्रान्सबीच प्रतिस्पर्धा हुदैछ ।

इंग्लिस क्लब चेल्सी र स्पेनिस क्लब रियल म्याड्रिडका स्टार खेलाडीसम्मिलित बेल्जियम सेमिफाइनलमा दुई गोलको अग्रता जोगाउन नसक्दा फ्रान्ससँग ३–२ ले पराजित हुदै फाइनल पुग्नबाट वञ्चित बनेको थियो ।

बेल्जियमका प्रशिक्षक रोबर्टाे मार्टिनेजले लुकाकु र हाजार्डले चोट बोकेको र फिटनेसका कारण पनि उनीहरु टोलीमा नरहने पुष्टि गरेका छन् ।

‘उनीहरु खेल्नको लागि राम्रो अवस्थामा छैनन् । चोटका कारण नै उनीहरु राष्ट्रिय टोलीबाट बाहिरिएका छन् ।’ मार्टिनेजले भने, ‘उनीहरुलाई निको हुन कति समय लाग्नेछ, मलाई थाहा छैन । यो थकान हो । लुकाकुले खेल्न सक्ने अवस्था छैन । उनको मांशपेशीमा पनि समस्या छ । हाजार्डले चोट बोक्दै बाहिरिएको तपाईहरुलाई थाहा नै छ ।’ उनको चोटबारे हाम्रो मेडिकल स्टाफले निगरानी गरिरहेको र हामी आफ्नो खेलाडीको राम्रो भन्दा पनि राम्रो चाहने प्रशिक्षक मार्टिनेजले बताए ।