काठमाडौं (हाम्रो खेलकुद) – नेपाली राष्ट्रिय फुटबल टोलीका फरवार्ड अन्जन विष्टले साफ च्याम्पियनसिप अन्तर्गत भारतविरुद्ध हुने फाइनल खेल गुमाउनेछन् । आफू उपस्थित नभएपनि आफ्ना सहकर्मीले मिहिनेत गरेर नेपाललाई फाइनल जिताउने उनले बताएका छन् ।

अन्जनले शुक्रबार सामाजिक संजालमा लेख्दै भारतविरुद्ध खेलपछि दर्शकबाट आफूलाई गद्दारको संज्ञा दिँदै आएको गालीप्रति दुख समेत व्यक्त गरेका छन् । उनले आफू सधैं नेपालको लागि शत प्रतिशत मिहिनेत गर्ने बताउँदै फाइनलमा आफू नभएपनि टोलीका अन्य खेलाडीले मिहिनेत गरेर टोलीलाई जिताउने बताए ।

अन्जनले सामाजिक संजालमा लेखेका छन्, ‘मैले राष्ट्रिय टोलीका लागि डेब्यु गरेको दिनदेखि नै आफ्नो देशको लागि सबथोक दिँदै शत प्रतिशत प्रतिवद्ध भएर लागेको छु । भारतविरुद्ध खेलपछि मैले धेरै गालीको संदेश पाएँ, केहीले मलाई देशको गद्दार समेत भने । मैले समर्थकबाट यस्तो अपेक्षा गरेको थिइनँ । तर मैले अझै बलियो बनेर अघि बढ्न सिकेको छु । टोली समस्यामा हुँदा यस्तो संदेश दिने असली समर्थक होइनन् । यदि तपाईंले कठिन मोडमा टोलीलाई साथ दिन सक्नुहुन्न भने तपाईं जितको बेलामा पनि साथ दिन लायक हुनुहुन्न ।’

‘हारको बेलामा खेलाडीले गाली खाएको यो पहिलो अवसर होइन । म सबैलाई यस्तो गलत कार्य नगर्न आग्रह गर्दछु । हामी हरेक खेल गर्वका साथ खेल्छौं र आफू व्यक्तिगत रुपमा नभएर देशको लागि खेल्छौं । देश नेपाल जसको सुर्य र चन्द्रले हामी वीर नेपालीको शालीनता र स्वच्छ भावना दर्शाउँछ । हामी गोर्खाली हौं र हामी तपाईंको साथ र सहयोगले अझ बलियो बन्छौं, न की तपाईंको खराब शब्दले ।’

‘म व्यक्तिगत रुपमा फाइनल खेल्न नपाउँदा एकदम दुखि छु । मैले मैदानमा रहँदा सधैं शत प्रतिशत मिहिनेत गरेको छु । म आफू त मैदानमा हुन्न तर मलाई थाहा छ मेरो सहकर्मीहरुले सबथोक दिनेछन् । यहाँबाट अघि बढौं । टोलीका लागि सधैं साथ छु । अब यो अन्तिम खेलका लागि एकसाथ बढौं ।’

बुधबार भएको लिग चरणको अन्तिम खेलमा बंगलादेशविरुद्ध बराबरी गोल फर्काउँदै नेपाललाई फाइनल पुर्याउन नायक बनेका अन्जनले खेलमा पहेंलो कार्ड पाएका थिए । जारी प्रतियोगितामा अन्जनको यो दोस्रो पहेंलो कार्ड भएका कारण उनले अर्को खेल गुमाउने भएका हुन् । अब नेपालको लागि अर्को खेल फाइनल भएकाले नै उनी उपस्थित नहुने भएका हुन् ।

अन्जनले यसअघि भारतविरुद्ध खेलको अन्तिम समयमा पहेंलो कार्ड पाएका थिए । बंगलादेशविरुद्ध उनले खेलको ४४ औं मिनेटमा कार्ड पाएका थिए । क्रसमा आएको बललाई हातले हान्न खोजेपछि रेफ्रीले उनलाई पहेंलो कार्ड दिएका थिए । खेलको ८६ औं मिनेटमा अन्जनलाई नै पेनाल्टी क्षेत्रभित्र लडाएपछि नेपालले पेनाल्टी पाएको थियो । त्यसै पेनाल्टीलाई गोलमा परिणत गर्दै उनले फाइनल यात्रा पक्का गरेका थिए ।

अन्जन पछिल्लो समय नेपाली टोलीको मुख्य खेलाडीका रुपमा अघि आएका छन् । अलमुताइरीको आगमनसँगै उनले थप आक्रामक भूमिका निर्वाह गर्दै आएका छन् । जारी प्रतियोगितामा पनि अन्जनले नेपालका लागि सर्वाधिक २ गोल गरेका छन् । श्रीलंकाविरुद्ध ३-२ को जितमा पनि उनले गोल गरेका थिए ।

अन्जनले हालसम्म राष्ट्रिय टोलीका लागि ७ गोल गरेका छन् । उनले अलमुताइरी आएपछि मात्र १० खेलमा ५ गोल गरिसकेका छन् । अन्जनको अनुपस्थितिले फाइनलमा नेपाललाई पक्कै घाटा पुग्नेछ ।

अन्जनले गत साता श्रीलंकाविरुद्ध जितपछि बोल्दै उनले प्रशिक्षकको विश्वासका लागि धन्यवाद व्यक्त गरेका थिए । ‘म सबै खेलाडी सहकर्मी, प्रशिक्षक र समर्थकलाई धन्यवाद दिन चाहन्छु । मुख्य कुरा प्रशिक्षकले मलाई विश्वास गर्नुभएकोमा आभारी छु । प्रशिक्षकले भन्नुभएको जस्तै प्रतियोगिता अझै बाँकी छ । हामी अन्त्यसम्म पनि लड्नेछौं,’ उनले भनेका थिए ।

नेपालका लागि अन्तर्राष्ट्रिय फुटबलमा सर्वाधिक गोलको कीर्तिमान १३ गोल छ । हरि खड्का र निराजन रायमाझीको नाममा रहेको यो कीर्तिमान तोड्न कसैले सकेको छैन । उक्त कीर्तिमान तोड्न सक्नेबारे के लाग्छ भन्ने प्रश्नमा अन्जनले आफू सक्दो मिहिनेत गर्ने बताएका थिए ।

‘कीर्तिमान राख्ने सपना त भइहाल्छ । अहिलेसम्म पनि १३ गोलमा नै अड्किएको छ । मुख्य कुरा भनेको हाम्रो नेपालमा फरवार्डले मात्र गोल हान्नुपर्छ भन्ने सोच छ । तर अहिले प्रशिक्षकले जसले पनि गोल हान्न सक्छ भन्ने विश्वास गर्नुभएको छ,’ उनले थपे, ‘आज पनि मिडफिल्डरले गोल हानेको छ । मेरो पनि चाहना छ कि त्यो रेकर्ड तोड्ने । अझै मिहिनेत गर्नेछु र आशा गरौं त्यो रेकर्ड तोड्न सक्नेछु ।’

यो पनि पढ्नुहोस् : सफल अलमुताइरी : नेपाललाई साफ खेलाउने १२औं प्रशिक्षक