एजेन्सी – फिफा विश्वकप कतार २०२२ को एसियाली छनोटमा जापान र दक्षिण कोरियाले जित निकाल्दा अष्ट्रेलिया बराबरीमा रोकिएको छ ।

समूह ‘बी’ को खेलमा जापानले भियतनाममाथि उसकै मैदानमा १–० को झिनो जित निकालेको हो । जापानको जितमा १७औं मिनेटमा जुन्या इटोले गरेको गोल नै निर्णायक बन्यो ।

जितपछि जापानले विश्वकपमा छनोट हुने सम्भावना जीवितै राखेको छ । जापान ५ खेलबाट ९ अंक जोडेर तेस्रो स्थानमा रहेको छ । पराजित भियतनाम अंकविहीन हुँदै पुछारमा छ । यो समूहमा ओमानको ६ तथा चीनको ३ अंक छ ।

शीर्षस्थानको साउदी अरेबियाको १३ तथा अष्ट्रेलियाको १० अंक छ । यि दुई टोलीले बिहीबार गोलरहित बराबरी खेल्दै अंक बाँडेका छन् ।

समूह ‘ए’ को खेलमा दक्षिण कोरियाले संयुक्त अरब इमिरेट्स (युएईं) लाई १–० ले हराएको छ । ३६औं मिनेटमा हि चान ह्वाङले पेनाल्टीमार्फत गरेको गोल नै कोरियाको जितमा निर्णायक बन्यो ।

यही समूहको अर्काे खेलमा इरानले लेवनानमाथि २–१ को पूनरागमन जित निकालेको छ । इरानको जितमा सरदार एजमोउन र अहमद नोउरोलाहीले गोल गरे । घरेलु टोली लेवनानका सोनी सादको गोल सान्त्वना बन्यो ।

यो नतिजापछि इरान ५ खेलबाट १३ अंक जोडेर शीर्षस्थानमा यथावत रहेको छ । लेवनान ५ अंक जोडेर तेस्रो स्थानमा रहेको छ । दक्षिण कोरिया ११ अंक जोडेर दोस्रो स्थानमा रहँदा पराजित युएईं ३ अंक जोडेर चौथो स्थानमा रहेको छ । एक खेल कम खेलेको इराकको ३ तथा सिरियाको १ अंक छ ।