काठमाडौं (हाम्रो खेलकुद) – सामाजिक संजालमा चर्चित युवाहरुको समुह दारी ग्याङले आगामी भदौ १४ र १५ गते फुट्सल प्रतियोगिता आयोजना गर्ने भएको छ ।

प्रतियोगिता नागर्जुन नगरपालिका-६, रामकोट स्थित ब्रुह स्पोर्ट्स सेन्टरमा हुनेछ । प्रतियोगिताको शिर्ष प्रायोजक बिज एजुकेशन रहेको छ भने मिडिया पार्टनर रुटिन अफ नेपाल बन्द रहेको छ । प्रतियोगिताको प्रत्यक्ष प्रसारण हाम्रो खेलकुदको फेसबुक र युट्युब च्यानल मार्फत हुनेछ। हाम्रोखेलकुद प्रतियोगिताको ब्रोडकास्टिङ पार्टनर रहेको छ ।

प्रतियोगितामा २४ देखि ३२ टिमको सहभागिता रहनेछ । पहिलो दिन लिग चरण र दोस्रो दिन नकआउट चरणका खेल हुनेछन् । लिग चरणका खेल १४ मिनेटका हुनेछन् भने नकआउट चरणका खेल २० मिनेटको हुनेछ ।

प्रतियोगिता खुल्ला किसिमको भएकाले नेपाली नागरिक जोसुकैले टिम दर्ता गर्न सक्नेछन् । तर राष्ट्रिय फुट्बल र फुटसलको ए डिभिजन खेलिसकेका खेलाडीले भने भाग लिन पाउने छैनन् । दारी ग्याङ्गको वेबसाइटमा रहेको यो फर्म भरेर आफ्नो टिम दर्ता गर्न सकिनेछ ।

टिम दर्ताका लागि पाँच हजार दर्ता शुल्क र चार हजार धरौटी शुल्क लाग्नेछ। धरौटी रकम अनुशासन कमिटीको रायपछी फिर्ता हुनेछ। सम्पूर्ण खेलहरु फिफाको फुट्सल नियम अनुसार खेलाइनेछ ।

प्रतियोगिताको विजेताले ५० हजार नगद, ट्रफी, मेडल र प्रमाणपत्र प्राप्त गर्नेछ भने उप-विजेताले ३० हजार नगद, मेडल, र प्रमाणपत्र प्राप्त गर्नेछ। त्यसै गरि उत्कृष्ट खेलाडी, उत्कृष्ट गोलरक्षक र शिर्ष गोलकर्ताले क्रमशः गोल्डेन बल, गोल्डेन ग्लोभ्स र गोल्डेन बुटका साथसाथै पाँच-पाँच हजार नगद, पदक र प्रमाणपत्र प्राप्त गर्नेछन।

‘परोपकारका लागी फुटसल’ भन्ने नाराका साथ आयोजना हुन लागेको प्रतियोगिताबाट बचत भएको रकम मार्फत भविष्यमा सामाजिक कार्यक्रमहरु आयोजना गर्ने आयोजक समिती सदस्य महेश्वर घिमिरेले बताए ।

वि.स. २०७२ सालमा स्थापित दारी ग्याङ दारीलाई माया गर्ने, दारी पाल्न रुचाउने र सामाजिक कार्यमा संलग्न युवाहरुको समूह हो । त्यसो त, समुहमा हुनलाई दारी पाल्नै पर्छ भन्ने वाध्यताकारी नियम भने छैन । समुहको संजाल देशै भरी र विदेशमा समेत रहेको छ ।

भुकम्प, बाढीपहिरो लगायतका प्राकृतिक विपत्ती, कोरोना महामारी, नो सेभ नोभेम्बर र क्यान्सर सचेतना, नियमित र आकस्मिक रक्तदान, रक्त समूह परिक्षण, निशुल्क स्वास्थ्य शिविर, सरसफाई अभियान, परिस्थितीजन्य जनचेतनामूलक कार्यक्रम, सांस्कृतिक धरोहर चिनारी र संरक्षण, सडक नाटक प्रदर्शनी, विद्यालय र विद्यार्थीहरुलाई ह्वाइट बोर्ड/स्टेशनरी/खेलकुद/ड्रेस, विज्ञान प्रदर्शनी, अशक्त/असहायलाई घर निर्माण, साक्षरता तालिम लगायत समाजसंग जोडिएका विभिन्न क्रियाकलापमा समूह सकृय छ ।