दोर्जे गियर, ठमेलले सेल्कन कप प्रथम सिक्स ए साइड खुला फुटबल प्रतियोगिताको उपाधि शनिबार जितेको छ ।
चावहिलमा भएको फाइनलमा दोर्जेले हाइवे फुटसललाई ३–० गोलअन्तराले पराजित गर्यो । तीनै गोल सन्तोष तामाङबाट सम्भव भयो ।
सेमिफाइनलमा दोर्जेले लक्की ब्वाइजलाई टाइब्रेकरमा ३–२ तथा हाइवेले आयोजक चावहिल स्पोर्ट्स क्लबलाई १–० गोलले हराउदै फाइनलमा स्थान सुरक्षित गरेका थिए ।
उपाधिसंगै दोर्जेले १ लाख नगद पुरस्कार हात पार्यो । उपविजेता हाइवेले ५० हजार नगदमा चित्त बुझायो ।
प्रतियोगितामा हाइवेका कृष्णगोपाल श्रेष्ठ उत्कृष्ट खेलाडी चुनिए भने कान्जिरोवाका सुशान्त नेपाल उत्कृष्ट गोलरक्षक घोषित भए । दुवैले पुरस्कार स्वरुप सेल्कन मोबाइल पाए । त्यस्तै प्रतियोगितामा सहभागी फास्ट टु फास्ट ग्रुपका ५० वर्षिय भरत थापालाई उनको खेलको प्रशंसा गर्दै आयोजकले सेल्कन मोबाइल प्रदान गर्यो ।
विजेतालाई युवा नेता गगनकुमार थापा, मुख्य प्रायोजक सेल्कन मोबाइलका चेयरम्यान भुवनेश्वर शर्मा, आयोजक क्लबका अध्यक्ष अजब श्रेष्ठलगायतले पुरस्कृत गरे । साउन १५ गतेदेखि सुरु नकआउट प्रतियोगितामा ४९ टिम सहभागी थिए ।
