नेपालगन्ज (हाम्रो खेलकुद) – नेपालगन्ज पिस म्याराथनको उपाधि नेपाली सेना कृष्ण बस्नेतले जितेका छन् । आइतबार उनले २ घण्टा २६ मिनेट ४० सेकेन्डमा दुरी पुरा गर्दै उपाधि जितेका हुन् । म्याराथनका शीर्ष ५ भित्र सेनाका खेलाडी नै परेका छन् ।

सेनाकै खगेन्द्र बहादुर भाट दोस्रो र खड्ग बहादुर खड्का तेस्रो भए । खगेन्द्रले २ घण्टा ३० मिनेट १३ सेकेन्डमा र खड्काले २ घण्टा ३४ मिनेट ०६ सेकेन्डमा दुरी पुरा गरेका थिए । सेनाका लाल बहादुर थापा चाथौै, मोहन जोशी पाँचौं र सशस्त्र प्रहरीको एपिएफ क्लवका खिम बहादुर खत्री छैटौं भए ।
बर्दियाका शेर बहादुर थारु सातौँ र सेनाका विष्णु कुमार तामाङ आठौँ भए । बस्नेतले ५१ हजार रुपैयाँसहित शिल्ड, प्रमाण पत्र प्राप्त गरे । खगेन्द्रले २५ हजार, खड्गले १५, थापाले १० हजार रुपैयाँ पाए । पाँचौंदेखि आठौं हुने खेलाडीले समान ५ हजार रुपैयाँ पाए । महिला हाफ म्याराथनका उपाधि एपिएफकी कान्छीमाया कोजुले जितिन् ।

५ किलोमिटर म्याराथुनमा छात्रा तर्फ जुम्लाका सरिता न्यौपाने जितिन् । जुम्लाकै अमृता भण्डारी दोस्रो र मन्जु रावत तेस्रो भइन् । त्यस्तै छात्रतर्फ बाँकेका सागर बुढाथोकी प्रथम, जुम्लाका नरेश बुढा र हेमराज थापा तृतिय भए । आइतबार नै भएको ४ सय मिटर ह्वील चियर तर्फ बाँकेका कलम बहादुर बस्नेत प्रथम, नन्कु चौधरी दोस्रो र यज्ञ बहादुर थापा तेस्रो भए । विजेताहरुलाई ओलम्पिक कमिटीका कोषाध्यक्ष रतन टण्डन लगायतले पुरस्कार तथा प्रमाण पत्र वितरण गरेका थिए ।
क्रियटिभ हेन्ड्सको आयोजना तथा मध्यपश्चिम खेलकुद विकास समिति र नेपाल एथ्लेटिक्स संघको समन्वयमा भएको नेपालगन्ज पिस म्याराथनको उद्घाटन नेपाल ओलम्पिक कमिटीका अध्यक्ष जीवनराम श्रेष्ठले गरेका थिए । विस्तृत शान्ति सम्झौता भएको दिनको स्मरणमा ‘नेपालगन्ज पिस म्याराथन’ भएको हो ।
गत वर्ष नेपाली सेनाका होमलाल श्रेष्ठ ‘नेपालगन्ज पिस म्याराथन २०१५ को उपाधि जित्न सफल भएका थिए । सशस्त्र प्रहरी बलको एपीएफ क्लबका गणेशसिंह ठकुरी द्वितीय र एपीएफकै दानबहादुर धामी तृतीय भएका थिए । महिला मिनी म्याराथनको उपाधि सशस्त्र प्रहरी बल एपीएफ क्लबकी कृष्णेश्वरी सिन्तकलाले जितेकी थिइन् ।