काठमाडौं (हाम्रो खेलकुद) – बंगलादेशमा जारी एभिसी एसियन सेन्ट्रल जोन भलिबल अन्तर्गत महिलातर्फ नेपालले बलियो उज्वेकिस्तानसँग खेल्दैछ ।

खेल ढाका मिरपुरस्थित शाहिद शुरवार्दी इन्डोर स्टेडियममा नेपाली समयअनुसार दिउँसो १ः१५ बजे हुनेछ । अपराजित रहेको दुवै टोली जित निकाल्दै फाइनल पुग्ने लक्ष्यमा कोर्टमा उत्रनेछ । दुवै टोलीले समान तीन खेल जितेका छन् । समान तीन खेल जितेपनि नेपालले श्रीलंकासँग एक अंक गुमाउन पुगेको थियो ।

शीर्षस्थानको उज्वेकिस्तानको ९ तथा नेपालको ८ अंक छ । यस्तोमा जित हात पार्ने टोलीले फाइनलमा स्थान बनाउनेछ । पराजित हुने टोलीले लिग चरणको अन्तिम खेलको नतिजा कुर्नुपर्ने हुन्छ ।

यस्तोमा साविक विजेता नेपाल बलियो उज्वेकिस्तानलाई हराउँदै फाइनलमा स्थान सुरक्षित गर्न चहान्छ । टोलीसँग प्रतिभा माली, सरस्वती चौधरी, कप्तान अरुणा शाही, सुनिता खड्का, उषा भण्डारी, साफिया पुन र सलिना श्रेष्ठलगायतको खेलाडीको साथ रहेको छ । यस्तै कामना विष्ट, शान्ति थारु, कृपा अधिकारी, मनिषा श्रेष्ठ र लक्ष्मी चन्द पनि टोलीमा छन् ।

यता, उज्वेकिस्तान पनि नेपाललाई स्तब्ध पार्दै लगातार चौथो जित निकालेर फाइनलमा स्थान सुरक्षित गर्न चहान्छ । महिलातर्फ उज्वेकिस्तान, नेपाल र श्रीलंकाको फाइनल पुग्ने सम्भावना रहेको छ । श्रीलंकाको ७ अंक छ । श्रीलंकाले बंगलादेश र उज्वेकिस्तानसँग खेल्न बाँकी छ । किर्गिस्तानको ३ अंक छ । माल्दिभ्स र बंगलादेशले अंकको खाता खोल्न सकेको छैन ।

महिलातर्फ आयोजक बंगलादेश, किर्गिस्तान, माल्दिभ्स, नेपाल, श्रीलंका र उज्वेकिस्तान गरी ६ राष्ट्रको सहभागिता छ । राउन्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछन् । त्यस्तै, तेस्रो र चौथो टोलीले तेस्रो स्थानको लागि प्रतिस्पर्धा गर्नेछ । फाइनल २९ डिसेम्वरमा हुनेछ ।

यस्तै पुरुषतर्फ नेपालले आफ्नो लिगको अन्तिम खेलमा माल्दिभ्ससँग खेल्नेछ । खेल दिउँसो ३ः४५ बजे हुनेछ । फाइनल पुग्ने सम्भावना सकिएको नेपालको लागि शीर्ष चारमा रहन यो खेलमा जित आवश्यक छ । आज नै बंगलादेश र श्रीलंकाबीच खेल हुनेछ । सोमबार श्रीलंका र माल्दिभ्स तथा बंगलादेश र उज्वेकिस्तानबीच खेल हुनेछ । मंगलबार फाइनल र तेस्रो स्थानको लागि खेल हुनेछ ।

पुरुषतर्फ आयोजक बंगलादेश, माल्दिभ्स, नेपाल, श्रीलंका र उज्वेकिस्तान गरी पाँच राष्ट्रको सहभागिता रहेको छ । लिग चरणमा बंगलादेश र श्रीलंकाको दुई खेलबाट समान ६ अंक छ । नेपाल र उज्वेकिस्तानको समान तीन खेलमा ३ अंक छ । माल्दिभ्सले अंकको खाता खोल्न सकेको छैन ।