काठमाडौ (हाम्रा खेलकुद) – नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए), नेपाल ओलम्पियन संघ र राष्ट्रिय खेलकुद परिषद् (राखेप) कर्मचारी संघले नेपाली खेलकुदको सर्वाेच्च निकाय राष्ट्रिय खेलकुद परिषद् (राखेप) मा देखिएको शून्यता छिटो हटाउन माग गर्दै बिहीबार शान्तिपुर्ण आन्दोलन गर्ने निर्णय गरेका छन् ।

एनएनआइपिए, ओलम्पियन संघ र राष्ट्रिय खेलकुद परिषद् (राखेप) कर्मचारी संघले बुधबार संयुक्त रुपमा विज्ञप्ति जारी गर्दै खेलकुदलाई अनिर्णयको बन्दी बनाउन नहुने माग गर्दै सरकारको ध्यानाकर्षण गराउन शान्तिपूर्ण आन्दोलन गर्ने निर्णय गरेको हो ।

तीन संस्थाले सदस्य सचिवको विवाद कानुनी रुपमा किनारा नलाग्दासम्मको अवस्थामा खेलकुदलाई चलायमान गराउन र उक्त रिटको शिघ्र किनारा लगाउन सर्वाेच्च अदालतसमक्ष आग्रह गर्दै परिषदको काम कारवाहीलाई नियमित सञ्चालन गरी सुचारु राख्नका लागि सम्वन्धित निकायलाई ध्यानाकर्षण होस् भन्नको लागि शान्तिपुर्ण विरोध कार्यक्रम गर्न बाध्य बनेको विज्ञप्तिमा उल्लेख छ ।

तीन संघले सदस्य सचिवको बर्खास्ती र नियुक्तिको विषयमा सर्वाेच्चमा परेको रिटको सुनुवाई समयमा हुन नसक्दा समग्र खेलकुद नै अनिर्णयको बन्दी बन्दा यसै वर्ष चीनमा हुने एसियन खेलकुुद, गण्डकी प्रदेशमा हुने नवौँ राष्ट्रिय खेलकुद र पाकिस्तानमा हुने १४औं दक्षिण एसियाली खेलकुद (साग) को तयारी प्रभावित बनेको तथा परिषदमा कार्यरत प्रशिक्षक, कर्मचारीलगायत सम्वन्धित सबैको काममा प्रत्यक्ष रुपमा असर पारेको विज्ञप्तिमा उल्लेख छ ।

परिषदले नियमित काम गर्न समेत नसकेको अवस्थामा नियमित काममा फर्काउनको लागि नेपाल सरकार र सम्वन्धित युवा तथा खेलकुद मन्त्रालयको ध्यानाकर्षण गराएको छ ।

सरकारले तत्कालीन सदस्य सचिव रमेशकुमार सिलवाललाई १ कात्तिकमा बर्खास्त गर्दै टंकलाल घिसिङलाई १३ मंसिरमा सदस्यसचिव नियुक्त गरेपछि सिलवालले आफ्नो बर्खास्ती रोक्न र घिसिङको नियुक्ति खारेजीको माग गर्दैै दायर गरेको मुद्दामा सर्वोेच्चले अल्पकालीन अन्तरिम आदेश दिएको थियो । त्यसयता दुईपटक रिटको सुनवाइका लागि पेसी तोकेपनि दुवै पटक सरेको छ । अदालतले यस विषयमा माघ २४ गतेका लागि पुनः पेसी तोकेको छ ।