काठमाडौं (हाम्रो खेलकुद) – भोजपुरकी नङ्सल देवी तामाङ र विभागीय त्रिभुवन आर्मी क्लबबी रशिला महर्जनले दोहोरो जित निकाल्दै लिनिङ ११औं पुष्पलाल स्मृति र्‍याङकिङ राष्ट्रिय ब्याडमिन्टन प्रतियोगिता अन्तरगत महिला एकलतर्फको शीर्ष १२ भित्र क्वाटरफाइनलमा प्रवेश गरेका छन् ।

ललितपुरस्थित नखिपोट कभर्डहलमा मंगलबार भएको खेलमा शीर्ष वरियताकी नङ्सले समूह ‘ए’ मा एपिएफकी सुनयना मुखियालाई २१–१३ र २१–८ ले तथा दोस्रो खेलमा सेनाकी रोज पाण्डेलाई २१–१० र २१–१४ ले पराजित गर्दै अन्तिम आठमा स्थान सुरक्षित गरेकी हुन् ।

यस्तै राष्ट्रिय च्याम्पियन आर्मीकी रशिला महर्जनले पनि आफ्नो दुवै खेलमा जित निकाल्दै अन्तिम आठमा स्थान पक्का गरेकी हुन् । रशिलाले समूह ‘सी’को पहिलो खेलमा एपिएफकी जेशिका गुरुङलाई २१–१५ र २१–१६ ले तथा दोस्रो खेलमा फेलिट नेपालकी तारा आले मगरलाई २१–७ र २१–७ ले पराजित गरिन् ।

जेशिका १०औं संस्करणकी विजेता हुन् । आर्मीकी अमिता गिरी समूह ‘बी’ को विजेता बन्ने क्रममा फेलिट नेपालकी मनिषा खड्कामाथि २१–७ र २१–७ र सेनाकी प्रार्थना देउवामाथि १९–२१, २१–१६ र २१–१७ को जित निकालिन् ।

यसैगरी सेनाकी अनुमाया राईले समूह ‘डी’ को खेलमा एपिएफकी शोभा गौचनलाई २१–१२ र २१–१४ र पुलिसकी निता लम्सालमाथि २१–१४ र २३–२१ को जित निकालिन् । सुनयना मुखिया, प्राथना देउवा, जेशिका गुरुङ र निता लम्सालले पनि समूह उपविजेताको रुपमा अन्तिम आठमा पुग्न सफल भइन् ।

पुरुषतर्फ शीर्ष १६ भित्रको एकल प्रतिस्पर्धामा एपिएफका दीपेश धामी, आर्मीका नविन श्रेष्ठ, एपिएफका विजित थापा मगर, रिभाईभका प्रिन्स दाहाल र आर्मीका रुकेश महर्जनले दोहोरो जित निकाले । दिपेशले आर्मीका प्रफुल महर्जनलाई २१–१५, १८–२१ र २१–१४ ले तथा बाँकेका ईरफान अन्सारीलाई २१–८ र २१–१२ ले पराजित गरे । नविनले एपिएफका साजन कृष्णा ताम्राकारलाई २–१ ले तथा जीवन आचार्यलाई २१–७, २१–१५ ले पराजित गरे ।

बिजितले बाँकेका बिलाल बारिसलाई २१–९ र २१–१० र धातुका सुदीप सेढाईलाई २१–१४ र २१–१७ ले हराए । १०औं संस्करणका बिजेता प्रिन्सले बिष्णु कटुवाललाई २१–९, २१–१० ले तथा निराजन देवकोटालाई २१–४ र २१–९ ले पराजित गरे । यस्तै रुकेशले निराजन देवकोटालाई २१–१० र २१–८ ले तथा बिष्णुलाई २१–१३ र २१–१२ ले पराजित गरे । सुनिल, साजन, जीवन, सुदिप र दीपकले समान एक जित र एक हार बेहोरे ।

प्रतियोगिताको अवसरमा हालै विश्व ब्याडमिन्टनको जुनियरतर्फ नम्बर १ हुन सफल प्रिन्स दाहाल र महिला युगलतर्फ नम्बर ७ मा उक्लिन सफल रशिला महर्जनलाई नगद ८ हजार ५ सय र सम्मान पत्रद्वारा सम्मान गरिएको थियो । लिनिङ ११औं पुष्पलाल स्मृति ¥याङकिङ राष्ट्रिय ब्याडमिन्टन प्रतियोगिताका नेपाल ओलम्पिक कमिटिका अध्यक्ष जीवनराम श्रेष्ठले उद्घाटन गरे ।