नेपालगन्ज (हाम्रो खेलकुद) – भारतको हरियाणा स्पोर्टस् क्लब आठौं संस्करणको सगरमाथा सिमेन्ट प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको च्याम्पियन बनेको छ ।

नेपालगन्जस्थित कभर्डहलमा सोमबार भएको उपाधि भिडन्तमा हरियाणाले विभागीय नेपाल पुलिस क्लबलाई ३–० को सोझो सेटमा पराजित गर्दै च्याम्पियन बनेको हो । प्रतिस्पर्धात्मक बनेको पहिलो सेट हरियाणाले २६–२४ ले आफ्नो पक्षमा पार्न सफल भएको थियो । १८–२४ को अवस्थामा लगातार ६ अंक जोड्दै २४–२४ को बराबरीमा ल्याएपनि पुलिसले त्यसलाई निरन्तरता दिन सकेन ।

दोस्रो सेटमा कडा चुनौती पेश गरेपनि पुलिसले हरियाणालाई २१–२४ ले नतिजा सुम्पियो । तेस्रो सेटमा पुलिसले सुरुवाती अग्रता लिएपनि त्यसलाई जोगाउन नसक्दा हरियाणालाई पराजित हुन पुग्यो । हरियाणाले तेस्रो सेट २५–२३ ले आफ्ना्े पक्षमा पार्दै च्याम्पियन बन्न सफल भयो । सुरुवातमा पछि परेको हरियाणाले १५–१५ को बराबरीबाट पूनरागमन जित निकाल्न सफल भएको हो ।

लिग चरणमा पनि हरियाणाले पुलिसलाई ३–२ को सेटमा पराजित गरेको थियो । उपाधिसँगै हरियाणाले ५ लाख रुपैया प्राप्त गरेको छ । दोस्रो भएको पुलिसले २ लाख ५० हजार प्राप्त गर्नेछ ।

त्यसअघि सोमबार नै होङ्गान्जी न्यु डायमनड स्पोर्ट्स क्लबमाथि ३–० को सोझो सेटमा जित निकाल्दै विभागी त्रिभुवन आर्मी क्लबले प्रतियोगितामा तेस्रो स्थान हासिल गरेको छ ।

यो सँगै आर्मीले डायमन्डलाई लिग चरण र नकआउट चरण दुवैमा पराजित गर्द सफल भयो । तेस्रो भएको आर्मीले १ लाख रुपैया प्राप्त गरेको छ । चौथो भएको डायमन्डले ५० हजार रुपैया प्राप्त गरेको छ ।

प्रधानमन्त्री कपको पहिलो संस्करणमा नेपाल पुलिस क्लब, दोस्रोमा एपीएफ, तेस्रो र चौथोमा रेलवे टिम इन्डिया, पाँचौंमा एपीएफ, छैटौंमा पुलिस र सातौंमा एपीएफ च्याम्पियन बनेका थिए । यस संस्करणमा एपीएफले भाग लिएको छैन ।

१० चैतबाट शुरु भएको प्रतियोगितामा नेपालका ४ र भारतका दुईसहित ६ टोलीको सहभागिता रहेको थियो । सहभागी टोलीलाई दुई समूहमा विभाजन गरिएको थियो ।