काठमाडौं (हाम्रो खेलकुद) – विभागीय टोली त्रिभुवन आर्मी क्लब वीर गणेशमान सिंह स्मृति राष्ट्रिय बक्सिङ प्रतियोगिताको टिम च्याम्पियन बनेको छ ।

बसन्तपुर डबलीमा शनिबार भएको अन्तिम दिन ८ स्वर्ण र ४ रजतपदक जित्दै टिम च्याम्पियन बनेको हो । दोस्रो भएको एपिएफले २ स्वर्ण, ४ रजत ३ कास्य जित्न सफल भए । समान २ स्वर्ण, रजत र कास्य जितेको पुलिस तेस्रो भयो । प्रदेश १ र प्रदेश ७ ले समान एक रजत जिते ।

आर्मीले फ्लाइवेट ५२ केजी पुरुष, फ्लाइवेट ५१ केजी महिला, फिदरवेट ५७ केजी पुरुष, फिदरवेट ५७ केजी महिला, वेल्टरवेट ६९ केजी महिला, मिडलवेट ७५ केजी पुरुष, लाइट हेभीवेट ८१ केजी पुरुष र हेभीवेट ९१ केजी पुरुषमा स्वर्ण जित्न सफल भएको हो । लाइटवेट ६३ केजी पुरुषमा रजत, लाइटवेट ६० केजी महिलामा रजत र वेल्टरवेट ६९ केजी पुरुषमा रजतपदक जित्न सफल भए ।

शनिबार पुरुष ६३ केजी तौल समूहमा १३औं दक्षिण एसियाली खेलकुद (साग) का स्वर्ण विजेता भुपेन्द्र थापाले त्रिभुवन आर्मी क्लबका पुरन सुनारलाई तेस्रो बाउटमा टेक्निकल नकआउट गरे ।

वीर गणेशमान सिंह स्पोर्ट्स कमिटीको आयोजनामा भएको प्रतियोगिताको पुरुष ५२ केजी तौल समूहमा आर्मीका प्रेम चौधरीले एपीएफका प्रदीप महर्जनलाई अंकका आधारमा पराजित गर्दै स्वर्ण जिते । यो विधामा पुरुषमा चन्द्र बहादुर थापा र प्रदेश २ का मदन कृष्ण डंगोल तेस्रो भए ।

पुरुषकै ५७ केजीमा आर्मीका इन्द्र सुनारले १३औं सागका पदकधारी एपीएफका पुरन राईलाई अंकका आधारमा पराजित गर्दै स्वर्ण हात पारे । यो विधामा पुलिसका शम्भु राजवंशी र गण्डकी प्रदेशका सौगात कुमालले कास्य जिते । पुरुषकै ६९ केजी तौल समूहमा सागका स्वर्णधारी पुलिसका सनिल शाहीले आर्मीका दनबहादुर दर्लामीलाई पराजत गर्दै स्वर्ण हात पारे । सुदूरपश्चिमका भरत चन्द र बागमती शिरिस खनालले कास्य पाए ।

पुरुषको ७५ केजीमा आर्मीका दिपेश लामाले प्रदेश १ का सनम गुरुङलाई पहिलो बाउटमै नकआउट गर्दै स्वर्णमा कब्जा जमाए र मधेसका कोशिश श्रेष्ठ र कर्णालीका दिल राज भण्डारीले कास्य पाए ।

८१ केजी तौल समूहमा आर्मीका दीपक श्रेष्ठले सुदूरपश्चिमका श्यामबहादुर महतालाई एवानडनका आधारमा पराजित गरे स्वर्ण जित्न सफल भए । प्रदेश १ का प्रसाङ लिम्बु र बागमतीका रोशन स्याङ्तानले कास्य हात पारे । पुरुषकै ९१ केजी तौल समूहमा आर्मीका गणेश प्रधानले एपीएफका रविन नेपाललाई हराएर स्वर्ण जित्न सफल भए । गण्डकीका किरण विक र प्रदेश १ का प्रसिश रुचालले कास्य पाए ।

महिलाको ५१ केजी तौल समूहमा आर्मीकी मीनु गुरुङले पुलिसकी दिवाना शेर्मालाई हराएर स्वर्ण जित्न सफल भइन् । एपीएफकी सञ्जुमाया थिङ र लुम्बिनीकी माया खत्री केसीले कास्य जितिन् ।

महिलाकै ५७ केजीमा आर्मीकी चन्द्रकला थापाले पुलिसकी निशा तामाङलाई हराएर स्वर्ण हात पारिन् । एपीएफकी नङ्जा बुढामगर र प्रदेश १ की सुस्मिता राईले कास्य जितिन् ।

महिलाकै ६० केजीमा आर्मीकी संगीता दंगाललाई हराएर एपीएफकी संगीता सुनारले स्वर्ण जितिन् । बागमतीकी शशीकला राई र प्रदेश १ की नारिका राईले कास्य जितिन् । महिला ६९ केजी तौल समूहमा आर्मीकी पुनम रावलले एपीएफकी विनिता थापा मगरलाई हराउँदै स्वर्ण जितिन् । लुम्बिनीकी जुनमाया थारु र मधेशकी अपराजिता गोतानीले कास्य पाइन् ।

महिलाकै ७५ केजी तौल समूहमा एपीएफकी सरस्वती रानाले आर्मीकी निरु गुरुङलाई हराउँदै स्पर्ण जित्न सफल भइन् । मधेसकी पूजा गुप्ता र प्रदेश १ की त्रिशा लिम्बूले कास्य हात पारिन् । प्रत्येक स्पर्धाका विजेताले २५ हजार, उपविजेताले १५ हजार र तेश्रो हुने २ खेलाडीले समान ७ हजार ५ सय नगद पुरस्कार प्राप्त गरे ।

विजयी टोलीलाई नेपाली कांग्रेसकी नेतृ सृजना सिंह लगायतले पुरस्कृत गरे । गत मंगलबारदेखि शुरु भएको प्रतियोगितामा पुरुषतर्फ ७ र महिलामा ५ गरी १२ स्पर्धा समावेश गरिएको थियो । प्रतियोगितामा सातै प्रदेश र तीन विभागीय टोली आर्मी, प्रहरी र एपीएफ गरी १० टिमका १ सय २ खेलाडीले प्रतिस्पर्धा गरेका थिए ।