काठमाडौं (हाम्रो खेलकुद) – आगामी सेप्टेम्बरमा चीनको हांग्झोउ शहरमा आयोजना हुने १९औं एसियन गेम्स (एसियाड) का लागि एथलेटिक्स र बक्सिङले प्रारम्भिक खेलाडी छनोट गर्ने भएका छन् ।

नेपाल एथलेटिक्स संघका सचिव आरके विष्टले आइतबार सूचना जारी गर्दै एसियाली खेलकुदका लागि त्रिपुरेश्वरस्थित दशरथ रंगशालाको ट्रयाकमा दुईदिने प्रारम्भिक छनोट हुने जनाएका छन् ।

एसियाडमा एथलेटिक्स खेलको पनि सहभागिता हुने हुँदा खेलाडीहरुको दक्षतालाई मध्यनजर गर्दै प्रारम्भिक छनौट प्रतियोगिता गर्नुपर्ने भएकोले काठमाडीको दशरग रंगशालामा २०७९ वैशाख १५ र १६ गतेका दिन छनौट गर्ने जानकारी गराइएको नेपाल एथलेटिक्स संघले जारी गरेको विज्ञप्तिमा उल्लेख छ ।

छनोटमा सहभागिताका लागि एथलेटिक्स संघले चार मापदण्ड समेत तोकेको छ । जसमा १३औं दक्षिण एसियाली खेलकुदमा पदक विजेता खेलाडीहरु, दक्षिण एशियाली खेलकुद पछिका अन्तर्राष्ट्रिय प्रतियोगितामा सहभागी भई पदक विजेता खेलाडीहरु, १३औं दक्षिण एसियाली खेलकुदमा बन्द प्रशिक्षणमा समावेश भएका खेलाडीहरु र म्याराथनको हकमा नेपालगन्ज, पोखरा र प्रधान सेनापति म्याराथनका उत्कृष्ट खेलाडीहरुले सहभागिता जनाउन पाउनेछन् ।

छनोटमा ५ विधा समावेश गराइएको छ । जसमध्ये ८०० र १५०० मिटर इभेन्टमा पुरुषको मात्र समावेश छ । ५ हजार र १० हजार मिटर दौड र म्याराथनमा पुरुष र महिला दुवै विधा समावेश गरिएको छ ।

यस्तै नेपाल बक्सिङ संघले एसियाडका लागि प्रारम्भिक खेलाडी छनोटका लागि आयोजना गर्न लागेको अधिराज्यव्यापी खुल्ला बक्सिङ प्रतियोगिताको दुई दिन पछि सरेको छ । यसअघि १२ देखि १५ वैशाखसम्म हुने भनिएको प्रतियोगिता अब १४ देखि १७ बैशाखसम्म सातदोबाटोमै हुनेछ ।

दुई सातापछि नै महिला बक्सरले टर्कीको इस्तानबुलमा आयोजना हुने आइवा वल्ड महिला बक्सिङ च्याम्पियनसिपका लागि जानुपर्ने भएकाले निश्चित तौल समूहमा मात्र एसियाडका लागि प्रारम्भिक छनोट गरी बन्द प्रशिक्षणमा राखिनेछ ।

महिलातर्फ ४८ देखि ५१ केजीमुनि पहिलो र दोस्रो हुने दुई जना, ५४ देखि ५७ केजीमुनि पहिलो, दोस्रो र तेस्रो हुने मध्येको दुई मध्ये १ उत्कृष्ट, ५७ देखि ६० केजीमुनि पहिलो, दोस्रो र तेस्रो हुने २ मध्ये उत्कृष्ट १ जना गरी ३ जना र ६४ देखि ६९ केजीमुनि ४ जनालाई प्रारम्भिक छनोटमा राखिनेछ ।

पुरुषतर्फ ४९ देखि ५२ केजीमुनि ४ जना, ५२ देखि ५७ केजीमुनि४ जना, ५७ देखि ६३ केजीमुनि ४ जना र ६९ देखि ७५ केजीमुनि ४ जनालाई प्रारम्भिक प्रशिक्षणमा राखिने संघले जनाएको छ ।

खेलाडीले यसअघि कुनैपनि अन्तरष्ट्रिय खेल खेलेको हुनुपर्ने, आठौं राष्ट्रिय प्रतियोगितामा पदक प्राप्त हुनुपर्ने, संघले आयोजना गरेको कुनैपनि राष्ट्रिय प्रतियोगितामा पदक प्राप्त र संघले भर्खरै आयोजना गरेको बागमती प्रदेश खेलकुद प्रतियोगितामा पहिलो भएको खेलाडी हुनुपर्ने प्रावधान राखेको छ । तर, यसभित्र नपरेका तर राष्ट्रलाई पदक दिाउन सक्ने प्रतिभावान खेलाडीले संघमा नाम टिपाउनु पर्ने उल्लेख गरिएको छ ।

एसियाड सेप्टेम्बर १० देखि २५ सम्म आयोजना हुनेछ ।