काठमाडौं (हाम्रो खेलकुद) – टर्कीको इस्तानबुलमा हुन लागेको  आईबा विश्व महिला बक्सिङ च्याम्पियनसिपको ‘ड्र’ सार्वजनिक भएको छ । सोमबार भएको ‘ड्र’ अनुसार ४६ देखि ४८ किलो तौल समुहमा नेपालकी सुस्मा तामाङले मंगोलियाका लान्चिव योन प्रतिद्धन्द्धी पाएको छ ।

उनले मंगलबार प्रतिस्पर्धा गर्नेछिन । यो तौल समुहमा ३२ बक्सर रहेका छन् । त्यसैगरी ५० देखि ५२ किलो तौल नेपालकी मिनु गुरुङले जापानका आर किनोशितासँग बुधबार प्रतिस्पर्धा गर्नेछिन् । यो तौल समुहमा २८ देशका बक्सरको सहभागिता रहेको छ ।

५४ देखि ५७ किलो तौल समुहमा चन्द्रकला थापाले बाई पाएर भारतीय खेलाडी मनिषासँग बुधबार खेल्ने तय गरेकी छिन् । ५७ देखि ६० किलो तौल समुहमा ३१ राष्ट्र रहँदा नेपाली पुनम रावलले प्रारम्भिक चरणमा बाई पाएकी छिन् । उनको प्रतिस्पर्धा ग्रिस र मोरक्कोविचको विजेतासँग १५ मेमा हुनेछ ।

च्याम्पियनसिपमा ७३ राष्ट्रका ३१० बक्सरको सहभागिता रहेको छ । च्याम्पियनसिपको विजेता, उपविजेता र तृतीय स्थान हासिल गर्ने खेलाडीहरुले १ लाख अमेरिकी डलर, ५० हजार अमेरिकी डलर र २५ हजार अमेरिकन डलरका दरले २ जनाले प्राप्त गर्नेछन् ।