काठमाडौं (हाम्रो खेलकुद) – नेपाल ओलम्पिक कमिटि (एनओसी) का अध्यक्ष जीवनराम श्रेष्ठ संस्कृति, पर्यटन तथा नागरिक उड्डयन मन्त्री बन्ने भएका छन् ।
प्रधानमन्त्री शेरबहादुर देउवाले आइतबार मन्त्रिपरिषद पुनर्गठन गर्दा नेकपा एकीकृत समाजवादी (एस) बाट सरकारमा सहभागी मन्त्री हेरफेर हुँदा राष्ट्रिय खेलकुद परिषद (राखेप) का पूर्व सदस्यसचिवसमेत रहेका एनओसी अध्यक्ष श्रेष्ठ संस्कृति, पर्यटन तथा नागरिक उड्डयन मन्त्री बन्ने भएका हुन् ।
सपथ सोमबार हुने बताइएको छ । एकीकृत समाजवादीबाट जीवनराम श्रेष्ठसँगै मेटमणि चौधरी शहरी विकास मन्त्री, शेरबहादुर कुँवर श्रम, रोजगार तथा सामाजिक सुरक्षामन्त्री, भवानी खापुङ स्वास्थ्य तथा जनसंख्या मन्त्री र हीरा चन्द्र केसी स्वास्थ्य तथा जनसंख्या राज्यमन्त्री बन्नेछन् ।
नेकपा एसले गत जेठ २२ मै आफ्ना पाँच मन्त्रीहरु फिर्ता बोलाएर सरकारमा नयाँ मन्त्रीहरु पठाउने निर्णय गरेको २२ दिनपछि मन्त्रिपरिषद पुनर्गठन भएको हो ।
संसदमा आगामी आर्थिक वर्ष ०७९-८० को बजेटमाथि छलफल चलिरहेका बेला मन्त्रीहरुले जवाफ नदिई हेरफेर गर्नु उचित नहुने भन्दै मन्त्री हेरफेर रोकिएको थियो ।
नेकपा एसले पर्यटन मन्त्री प्रेम बहादुर आलेसँगै श्रम मन्त्री किसन श्रेष्ठ, सहरी विकास मन्त्री रामकुमारी झाँक्री र स्वास्थ्य मन्त्री विरोध खतिवडालाई फिर्ता बोलाइएको छ ।
