default_image

1 year ago

November 14, 2022

युएईसँग नेपालको फराकिलो हार

काठमाडौं (हाम्रो खेलकुद) – अर्जुन साउद र दीपेन्द्रसिंह ऐरी बाहेक अन्य ब्याटर चल्न नसकेपछि नेपाल पहिलो ओडिआई खेलमा युएईसँग ८४ रनले पराजित भएको छ । योसँगै तीन ओडिआई खेलको सिरिजमा युएईले १-० को अग्रता लिएको छ । जितको लागि २ सय ६४ रनको विजयी लक्ष्य पछ्याएको नेपालले ५० ओभरमा ९ विकेट गुमाउँदै १ सय ७९ […]

132 views

0 Bookmark

काठमाडौं (हाम्रो खेलकुद) – अर्जुन साउद र दीपेन्द्रसिंह ऐरी बाहेक अन्य ब्याटर चल्न नसकेपछि नेपाल पहिलो ओडिआई खेलमा युएईसँग ८४ रनले पराजित भएको छ । योसँगै तीन ओडिआई खेलको सिरिजमा युएईले १-० को अग्रता लिएको छ ।

जितको लागि २ सय ६४ रनको विजयी लक्ष्य पछ्याएको नेपालले ५० ओभरमा ९ विकेट गुमाउँदै १ सय ७९ रन बनायो ।

दीपेन्द्रसिंह ऐरी ८४ बलमा ६ चौकासहित ५४ रनमा क्याच आउट भए । डेब्यू खेल खेलेका अर्जुन साउद ७९ बलमा ५ चौकासहित ५१ रनमा आउट भए । यी दुई बाहेक अन्य कुनैपनि ब्याटरले राम्रो प्रदर्शन गर्न सकेनन् ।

अर्जुन डेब्यू खेलमा अर्धशतक बनाउने कुशल मल्ल र ज्ञानेन्द्र मल्लपछि नेपालको तेस्रो खेलाडी हुन् । ज्ञानेन्द्र मल्लले २०१८ अगष्ट १ मा नेदरल्यान्ड्सविरुद्ध ५१ रन र कुशल मल्लले २०२० फेब्रुअरीमा अमेरिकाविरुद्ध टियु मैदानमा ५० रन बनाएका थिए । पाँचौं विकेटका लागि दीपेन्द्र र अर्जुनले ६८ रनको साझेदारी गरेका थिए ।

अर्जुन ३१ औं ओभरको पहिलो बलमा रोहन मुस्तफाको बलमा बोल्ड हुन पुगे । १७ वर्षीय स्पिनर आयन अफ्जल डेब्यू ओडिआईमा सानदार प्रदर्शन गर्दै चार विकेट लिएपछि युएईले सानदार जित हात पारेको हो ।

चोभार एण्डबाट बलिङ गर्दै डेब्यूको पहिलो बलमै आयनले आसिफ शेखलाई १२ रनमा एलबीडब्लू आउट गर्दै पहिलो सफलता दिलाए । त्यसको एक बलपछि ज्ञानेन्द्र मल्ल कभरमा एलिशान शराफुबाट शून्यमा क्याच हुन पुगे ।

आयनले नै नवौं ओभरको पहिलो बलमा कप्तान रोहित पौडेललाई एक रनमा बोल्ड आउट गरेपछि नेपाल ३२–३ रनको अवस्थामा पुगेको थियो ।

बासिल हामिदले हरिशंकर शाहलाई ८ रनमा स्टम्पिङ गराउँदै ४१–४ को अवस्थामा पुर्याए । कुशल भुर्तेल सातौं नम्बरमा ब्याटिङ गर्दै ६ रनमा फस्ट स्लिपमा सिपी रिजवानबाट क्याच आउट भए ।

भुर्तेललाई आउट गर्दै आयनले चार विकेट पूरा गरेका थिए । सोमपाल कामी र करण केसीले तीन तीन रन बनाए । गुलझन झा ३४ बलमा १ चौका र १ छक्कासहित १९ रनमा अविजित रहे । ललित राजवंशी ६ रनमा अविजित रहे ।

युएईका आयन अफ्जल खानले १० ओभरमा ४ मेडनसहित १४ रन खर्चेर ४ विकेट लिए । बासिल हामिदले ६ ओभरमा १ मेडनसहित १८ रन खर्चेर २ विकेट लिए । युएईका जहूर खान, रोहन मुस्तफा र अहमेद राजाले एक एक विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको युएईले निर्धारित ५० ओभरमा ७ विकेट गुमाउँदै २ सय ६३ रन बनायो ।

युएईका बायाँ हाते अनुभवी ब्याटर रोहन मुस्तफाले ७३ बलमा ७ चौकासहित सर्वाधिक ५३ रनमा बनाए । मुस्तफाको यो ओडिआई करिअरको छैटौं र नेपालविरुद्ध दोस्रो अर्धशतक हानेका हुन् ।

टियु एण्डबाट आएका तीव्र गतिका बलर गुलशन झाले आक्रामक सुरुवात गरेका ओपनर मोहम्मद वासिमलाई ४४ रनमा बोल्ड गर्दै नेपाललाई पहिलो सफलता दिलाए । वासिमले ४१ बलमा ६ चौका र १ छक्का प्रहार गरे ।

अन्तिम बलमा कभरमा युएईका कप्तान सिपी रिजवानको दुई रनमा कुशल भुर्तेलले उत्कृष्ट क्याच लिएपछि नेपालले एकै ओभरमा दुई विकेट लिएको थियो । पहिलो विकेटका लागि वासिम र वृत्य अरविन्दले १४.२ ओभरमा ७५ रनको साझेदारी गर्दै राम्रो सुरुवात दिलाएका थिए ।

११ औं ओभरको चौथो बलमा नेपालले वृत्य अरविन्दलाई १८ रनमा रन आउट गर्न चुकेको थियो । नन स्ट्राइकबाट मोहम्मद वासिमसँग तालमेल नमिल्दा उनी पिचको आधा भागमा गएर फर्किदा नेपालले रन आउट गर्ने राम्रो अवसर चुकाएको थियो ।

चोभार एण्डबाट आएका स्पिन अलराउन्डर दीपेन्द्रसिंह ऐरीले अरविन्दलाई २७ औं ओभरको पाँचौं बलमा एलबीडब्लू आउट गरे । अरविन्दले ८२ बलमा ६ चौकासहित ४० रनमा पेभेलिएन फर्के । तेस्रो विकेटका अरविन्द र रोहन मुस्तफाले ५२ रनको साझेदारी गरेका थिए ।

४२ औं ओभरको दोस्रो बलमा बासिल हामिद र एलिशान शराफुबीच तालमेल नमिल्दा दुबै ब्यार एकै एन्डमा दौडिएलका थिए । शारिफु २९ रनमा रन आउट भए । उनले ३९ बलमा २ चौका प्रहार गरे । बासिल हामी १६ बलमा १ चौकासहित १४ रनमा रन आउट भए ।

सातौं विकेटका लागि आयन अफ्जल खान र अहमेद राजाले ४८ रनको साझेदारी गर्दै बलियो योगफलमा पुर्याए । अन्तिम ओभरको चौथो बलमा रन आउट हुनुअघि खानले २८ बलमा १ चौका र १ छक्कासहित २६ रन बनाए । राजा १६ बलमा १ चौका र २ छक्कासहित २७ रनमा अविजित रहे ।

नेपालका तीव्र गतिका बलर गुलशन झाले ६ ओभरमा २६ रन खर्चेर २ विकेट लिए । सोमपाल कामीले १० ओभरमा ६७ रन खर्चेर १ विकेट लिए । दीपेन्द्रसिंह ऐरीले ८ ओभरमा ३० रन खर्चेर १ विकेट लिए । नेपालले दोस्रो खेल बुधबार र तेस्रो खेल शुक्रबार हुनेछ ।

April 10, 2024

आर्मीलाई हराउँदै मच्छिन्द्र सिमरा गोल्डकपको सेमिफाइनलमा

सुनिल गाउँले, सिमरा विभागीय टोली त्रिभुवन आर्मी क्लब विरुद्ध संघर्षपूर्ण जित निकाल्दै मच्छिन्द्र क्लब जगदम्बा स्टिल १४ औं जीतपुरसिमरा गोल्डकपको सेमिफाइनलमा प्रवेश गरेको छ । सिमरा रंगशालामा मंगलबार राति भएको प्रतिष्पर्धात्मक खेलमा मच्छिन्द्रले आर्मी १–० लाई हराउँदै अन्तिम चारको यात्रा तय गरेको हो । ६९ औं मिनटमा सौरभ लिम्बुले गरेको मच्छिन्द्रला लागि निर्णायक बनेको थियो […]

April 6, 2024

खड्का टिप-टो स्पोर्ट्स एकेडेमीको ब्रान्ड एम्बासेडर

काठमाडौं (हाम्रो खेलकुद) – नेपाली फुटबल टोलीका पूर्व कप्तान हरि खड्का टिप-टो स्पोर्ट्स एकेडेमीको ब्रान्ड एम्बासेडर र प्राविधिक सल्लाहकार (टेकनिकल एडभाईजर) नियुक्त भएका छन् । एन्फाका वर्तमान टेक्निकल डाइरेक्टर तथा नेपाली महिला फुटबल टोलीका पूर्व मुख्य प्रशिक्षक समेत रहेका खड्का हाल टिप-टो स्पोर्ट्स एकेडेमीसँग जोडिएका हुन् ।  नेपाली फुटसल टोलीका मुख्य प्रशिक्षक गौरव बस्नेतद्वारा संचालित […]

April 6, 2024

एन्फा महासचिव राई विरुद्ध सम्पत्ति शुद्धीकरणमा उजुरी

काठमाडौं (हाम्रो खेलकुद)- अखिल नेपाल फुटबल संघ (एन्फा) का महासचिव किरण राईमाथि एन्फामा भ्रष्टाचार र अनियमितताको‌ आरोप लागेको‌ छ । एन्फाको जिल्ला फुटबल संघ गोरखाका सदस्य अमित खत्रीले महासचिव राई विभिन्न शीर्षकमा अनियमितता संलग्न भएको आरोपसहित शुक्रबार सम्पत्ति शुद्धीकरण अनुसन्धान विभागमा छानविनको माग गर्दै उजुरी दर्ता गरेका छन् । खत्रीले एन्फामा र भ्रष्टाचार र वेथिति […]

Success

Thank you for your time.