काठमाडौं (हाम्रो खेलकुद) – बंगलादेशको कक्स बजारमा आयोजना हुने एसियन सेन्ट्रल जोन सिनियर पुरुष र महिला बिच भलिबल च्याम्पियनसिपमा सहभागिता जनाउन नेपाली बिच भलिबल टोली त्यसतर्फ प्रस्थान गरेको छ ।

नेपालको महिला र पुरुष बिच भलिबल टोली सोमबार त्यसतर्फ प्रस्थान गरेको हो । नेपाली टोलीलाई गत साता नै नेपाल भलिबल संघले एक कार्यक्रमकाबिच बिदाई गरेको थियाे ।

एसियन सेन्ट्रल जोन सिनियर पुरुष र महिला बिच भलिबल च्याम्पियनसिप ११ देखि १६ पुससम्म आयोजना हुँदैछ । पुरुषतर्फ मान बहादुर श्रेष्ठ र दिल सुनार तथा महिलातर्फ कोपिला उप्रेती र कमला पुनको जोडीले नेपालको चुनौती पेश गर्नेछन् ।

पुरुषतर्फ मान र दिलको जोडी र महिलातर्फ कोपिला र कमलाको जोडी खुल्ला र अन्तिम छनोटमा पहिलो भएर राष्ट्रिय टोलीमा स्थान बनाउन सफल भएका हुन् ।

प्रशिक्षकमा भरत साह र व्यवस्थापकमा जुनु पुन रहेका छन् । बिच भलिबलमा पुरुषतर्फ नेपाल, किर्गिस्तान, भुटान, बंगलादेश, भारत पाकिस्तान र माल्दिभ्सले प्रतिस्पर्धा गर्नेछन् । महिलातर्फ सहभागी टोलीको टुंगो लागेको छैन ।

बिच भलिबल टोली
पुरुषतर्फ – मान बहादुर श्रेष्ठ र दिल सुनार
महिलातर्फ – कोपिला उप्रेती र कमला पुन भरत साह (प्रशिक्षक) र जुनु पुन (टिम व्यवस्थापक)