काठमाडौं (हाम्रो खेलकुद) – फ्रेन्ड्स भेट्रान्स र भनिमण्डल भेट्रान्स ‘बी’ ले प्रथम भनिमण्डल कुसुन्ती भेट्रान्स फुटबल प्रतियोगितामा विजयी भएका छन् ।

जावलाखेलस्थित फुटबल मैदानमा बुधबार भएको खेलमा फ्रेन्ड्स भेट्रान्सले चावाहिल भेट्रान्सलाई २–१ ले पराजित गरेको हो । यस्तै भनिमण्डल भेट्रान्स ‘बी’ टिवाइसी भेट्रान्सलाई १–० ले पराजित गरेको छ ।

यस्तै जेभियर (टिम भेट्रान्स) ले कुमारी क्लबलाई १–० ले पराजित गरेको छ । अभिषेक चर्च भेट्रान्सले लाजिम्पाट एफसी भेट्रान्सलाई ३–० ले पराजित गरेको छ । आइएफसी भेट्रान्सले टुडिखेल भेट्रान्सलाई २–०, ओखाद भेट्रान्सले प्ले अन स्पोर्ट्स (बीबीसी) लाई ३–२, र फ्रिडम फाइटले वीरगन्ज भेट्रान्सलाई ३–१, चितवन भेट्रान्सले कपन भेट्रान्सलाई १–० ले पराजित गरेको छ ।

भनिमण्डल क्लब र कुसुन्ती युवा क्लबको संयुक्त आयोजनामा पुस २६ गते मंगलबारबाट शुरु भएको प्रतियोगितामा ३२ टोलीले नकआउटको आधारमा प्रतिस्पर्धा गरिरहेको छ । प्रतियोगिता पुस ३० गतेसम्म चल्नेछ ।

प्रतियोगिताको विजेताले १ लाख ५० हजार रुपैयाँ र शिल्ड प्राप्त गर्नेछन् । दोस्रो हुनेले ७५ हजार पाउनेछ । म्यान अफ दि सिरिजले बुद्ध एयरको माउन्टेन फ्लाइट, उत्कृष्ट गोलरक्षकले गोल्डेन ग्लोभ्स र नगद प्राप्त गर्ने आयोजकले जनाएको छ । म्यान अफ दि म्याच शिल्डको व्यवस्था गरिएको छ ।