काठमाडौं (हाम्रो खेलकुद) – होङ्गान्जी न्यु डायमण्ड युथ स्पोर्ट्स क्लबमाथि संघर्षपूर्ण जित निकाल्दै विभागीय नेपाल पुलिस क्लब सातौैं एनभिए महिला तथा पुरुष क्लब भलिबल च्याम्पियनसिपको महिलातर्फ समूह विजेता बन्दै सेमिफाइनलमा प्रवेश गरेकाे छ ।

पुलिसले न्यु डायमण्डलाई ३–२ को सेटमा पराजित गर्दै समूह ‘ए’ को विजेता बनेको हो । हारका बावजुत न्यु डायमण्ड समुह उपविजेता बन्दै अन्तिम चारमा पुगेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको खेलको पहिलो सेट पुलिसले २५–२२ ले आफ्नो पक्षमा पार्यो । दोस्रो सेट डायमण्डले २५–२२ ले जित्द्र खेललाई १–१ सेटको बराबरीमा ल्याए ।

तेस्रो सेट २५–१४ ले जित्दै पुलिसले खेलमा २–१ को अग्रता बनायो । चौथो सेट डायमन्डले २५–२३ जितेपछि खेल पाँचौ सेटमा लम्बियो । निर्णायक तथा पाँचौं सेटमा पुलिस १५–१० ले विजयी हुन सफल भयो । पुलिसकी कमला पुन केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्पर प्राप्त गरिन् ।

यस जितसँगै पुलिसले ३ खेलबाट ८ अंक जोडेको छ । डायमण्डले ७ अंक जोड्यो । यो समूहमा एभरेीटले ३ अंक जोड्यो । नयाँ बजार अंकविहीन बनेको छ ।

आज बिहीबार नै समूह ‘बी’ मा नेपाल एपिएफ क्लबले कृष्ण सेकेन्डरी एकेडेमीलाई ३–० को सोझो सेटमा पराजित गरी लगातार दोस्रो जित निकालेको छ । एपिएफले कृष्णमािथ २५–४, २५–६ र २५–३ को एकपक्षीय जित निकाल्यो । एपिएफकी पुजा चौधरी केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्पर प्राप्त गरिन् ।