तनहुँ (हाम्रो खेलकुद) – ठकुरी समाज बाबियाडाँडा तनहुँले साविक वडा स्तरीय भलिबल प्रतियोगिताको उपाधि जितेको छ ।
तनहुँको शुक्लागण्डकी नगरपालिका–१२ घडेरीमा भएको भएको फाइनलमा आयोजक मिलेनियम युवा क्लबलाई ३–२ को सेटमा पराजित गर्दै उपाधि जितेको हो ।
उपाधिसँगै ठकुरी समाजले ४० हजार रुपैयाँसँगै मेडल र ट्रफी प्राप्त गरेको छ । दोस्रो भएको आयोजक मिलेनियमले २५ हजार रुपैयाँ, मेडल र ट्रफी हात पारेको छ । तेस्रो भएको दरबारथोक युवा क्लब भुस्नापुरले १५ हजार पाएको छ । अमृत विक उत्कृष्ट खेलाडी घोषित भए ।
विजयी टोली तथा खेलाडीलाई शुक्लागण्डकी–१२ का वडाध्यक्ष ईन्द्र गुरूङ, घडेरी टोल विकास समितिका अध्यक्ष नेत्रनारायण गौतम र क्लबका अध्यक्ष नविन गुरुङलगायतले पुरस्कृत गरे ।
स्थानीय स्तरका खेलको संरक्षण र प्रर्वद्धनसँगै खेलाडीहरुको खेलप्रतिको मोह र आर्कषकलाई प्रेरणा दिने उद्देश्यका साथ कार्यक्रमको आयोजना गरिएको क्लबका अध्यक्ष नविन गुरुङले जानकारी दिए ।
शुक्लागण्डकी नगरपालिका –१२ का अध्यक्ष इन्द्र गुरुङले क्लबले कार्यक्रमलाई निरन्तरता दिईरहकोमा क्लबप्रति खुशी प्रकट गर्दै कार्यक्रमहरुलाई परिमार्जन गर्दै लैजान र यसले पर्यटन विकासमा समेत टेवा पुग्ने बताए ।
मिलेनियम युवा क्लब फिरफिरे घरेडीले ३१औं श्रीपञ्चमी मेलाको अवसर पारेर आयोजना गरेको साविकको वडा स्तरीय खुल्ला भलिबल प्रतियोगितामा २१ टोलीको सहभागिता रहेको थियो ।
मेलामा भलिबलसँगै कुर्ची घुमाई, बाँसको टुप्पोमा भाले निकाल्ने, छेलो प्रतियोगिता, भेट्रान्स भलिबल प्रतियोगिता साथै राष्ट्रिय स्तरको कलाकारहरुद्वारा लोक दोहोरी र नृत्य प्रस्तुती रहेको थियो ।
