काठमाडौं (हाम्रो खेलकुद) – होङ्गान्जी न्यू डायमण्ड युथ स्पोर्ट्स क्लबले छैटौं केएनपी नेरोलेक राष्ट्रिय महिला भलिबल प्रतियोगितामा विजयी सुरुवात गरेको छ ।

डायमण्डले विभागीय त्रिभुवन आर्मी क्लबलाई ३–० को सोझो सेटमा पराजित गर्दै विजयी सुरुवात गरेको हो । त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शनिबार भएको खेलको पहिलो सेटमा आर्मीले बलियो चुनौती पेश गरेपनि डायमण्ड २५–२० ले विजयी हुन सफल भयो ।

डायमण्डले १–४ ले पछि परेको स्थिति उल्ट्याएर ६–४ को अग्रता लिदै जित निकाल्न सफल भयो । त्यसपछिको दुई सेटमा भने डायमण्डले सहज जित निकाल्यो । दोस्रो सेटमा २५–१४ ले विजयी भएको डायमण्डले तेस्रो सेट २५–१० ले सहजै आफ्नो पक्षमा पार्यो ।

डायमण्डकी रिमा कुवँर खेलको प्लेयर अफ दि म्याच घोषित भइन् । उनले १० हजार रुपैयाँ र ट्रफी हात पारिन् । आर्मी आफ्नो मुख्य स्पाइकर शान्ति थारु र मिडल ब्लकर सुनिता खड्काविना नै खेल्दा खेलमा कमजोर देखिएको थियो । दुवै जना विरामी रहेको आर्मीका प्रशिक्षक लोकेश बुढाले जानकारी गराए । यस जितसँगै डायमण्डले ३ अंक जोडेको छ । आर्मी अंक विहीन छ ।

आज नै दोस्रो खेलमा दुई विभागीय टोली नेपाल एपिएफ क्लब र नेपाल पुलिस क्लबबीच प्रतिस्पर्धा हुँदैछ । २४ माघसम्म चल्ने प्रतियोगितामा तीन विभागीय टोलीसहित चार टोलीको सहभागिता रहेको छ ।

आइतबार र सोमबार लिग चरणका खेल हुनेछन् । मंगलबार प्रतियोगिताको फाइनल र तेस्रो स्थानको खेल हुनेछ । शीर्ष २ टोलीले उपाधिका लागि खेल्दा पुछारका दुई टोलीले तेस्रो स्थानका लागि प्रतिस्पर्धा गर्नेछन् ।

२०७२ सालदेखि हरेक वर्ष राष्ट्रिय महिला भलिबल प्रतियोगिता आयोजना गर्दै आइरहेको प्रतिष्ठानले कोरोनाका कारण पछिल्लो तीन वर्ष प्रतियोगिता गर्न सकेको थिएन ।

विजेताले ३ लाख रुपैयाँ र शिल्ड प्राप्त गर्नेछ । उपविजेताले १ लाख ५० हजार र तेस्रो हुने टोलीलाई ७५ हजार रुपैयाँ नगद पुरस्कार पाउनेछन् । सर्वोत्कृष्ट खेलाडीलाई ५० हजारसँगै अन्य आकर्षक पुरस्कार प्रदान गरिनेछ । विजेतालाई आयोजकले गोकर्ण फरेस्ट रिसोर्टमा रात्री भोजको व्यवस्था गर्नेछ ।

विधागततर्फ उत्कृष्ट हुनेलाई जनही १५ हजार र हरेक खेलको प्लेयर अफ दी म्याचलाई १० हजार रुपैयाँ नगद पुरस्कार प्रदान गरिनेछ यस्तै एक नयाँ खेलाडीलाई नगद १५ हजारसहित इमर्जिङ प्लेयर अवार्डबाट सम्मानित गरिनेछ ।

उद्घाटनको अवसरमा नेपाल तथा डायमण्डकी लिवेरो सलिना श्रेष्ठ शेर बहादुर स्मृति स्पेशल अवार्डबाट सम्मानित भएकी छिन् । उनलाई ५० हजार, दोसल्ला र कदरपत्रले सम्मानित गरिएको छ ।