काठमाडौं (हाम्रो खेलकुद) – विभागीय डर्वी भिडन्तमा नेपाल पुलिस क्लबले छैटौं केएनपी नेरोलेक राष्ट्रिय महिला भलिबल प्रतियोगिताको राउन्ड रोविन लिगको अन्तिम खेलमा त्रिभुवन आर्मी क्लबमाथि रोमाञ्चक जित निकालेको छ ।

पुलिसले आर्मीलाई ३–१ को सेटमा पराजित गरेको हो । पुलिसले पहिलो सेट गुमाएपनि त्यसपछिको तीनै सेट आफ्नो पक्षमा पार्न सफल हुँदै पहिलो जित निकाल्न सफल भएको हो ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सोमबार भएको राउन्ड रोविन लिगको अन्तिम खेलमा आर्मीले पहिलो सेटमा २६–२४ को रोमाञ्चक जित निकाल्न सफल भयो ।

दोस्रो सेटमा पुलिसले २६–२४ कै रोमाञ्चक जित निकाल्न सफल भयो । तेस्रो सेटमा पनि पुलिसले २६–२४ कै रोमाञ्चक जित निकाल्दै जिततर्फ अग्रसर बन्यो । चौथो सेटमा भने पुलिस २५–२० ले विजयी हुन सफल भयो ।

यस जितसँगै पुलिसले लिग राउन्डमा ३ खेलबाट ३ अंक बटुलेको छ । आर्मीले तीन खेलमै हार बेहोर्दे अंक बटुल्न सकेन । अब पुलिस र आर्मीबीच नै मंगलबार तेस्रो स्थानको लागि प्रतिस्पर्धा हुनेछ ।

उपाधिका लागि होङ्गान्जी न्यु डायमण्ड युथ स्पोर्ट्स क्लब र विभागीय नेपाल एपिएफ क्लबबीच प्रतिस्पर्धा हुनेछ । डायमण्डले राउन्ड रोविन लिगको अन्तिम खेलमा एपिएफलाई ३–१ को सेटमा पराजित गरेको छ ।

प्रतियोगितामा तीन विभागीय टोलीसहित चार टोलीको सहभागिता रहेको छ । विजेताले ३ लाख रुपैयाँ र शिल्ड प्राप्त गर्नेछ । उपविजेताले १ लाख ५० हजार र तेस्रो हुने टोलीलाई ७५ हजार रुपैयाँ नगद पुरस्कार पाउनेछन् । सर्वोत्कृष्ट खेलाडीलाई ५० हजारसँगै अन्य आकर्षक पुरस्कार प्रदान गरिनेछ ।

विधागततर्फ उत्कृष्ट हुनेलाई जनही १५ हजार र हरेक खेलको प्लेयर अफ दी म्याचलाई १० हजार रुपैयाँ नगद पुरस्कार प्रदान गरिनेछ यस्तै एक नयाँ खेलाडीलाई नगद १५ हजारसहित इमर्जिङ प्लेयर अवार्डबाट सम्मानित गरिनेछ ।