काठमाडौं (हाम्रो खेलकुद) – एचटुओकी अस्मिता दुवाल भारतको नयाँ दिल्लीमा हुन लागेको आइबा वल्ड वुमन्स बक्सिङ च्याम्पियनसिप २०२३ मा सहभागी हुन आयोजित छनोट प्रतियोगितामा छनोट हुन सफल भएकी छिन् ।

सातदोबाटोस्थित बक्सिङ हलमा बिहीबार भएको फ्लाई लाईट वेट ५० केजी तौल समूहमा अस्मिताले नेपाल पुलिसकी दिवाना शेर्मालाई ३ः२ अंक (स्पिलट डिसिजन) को आधारमा पराजित गर्दै छनोट हुन सफल भएकी हुन् ।

दुवालले सेमिफाइनलमा आरडीएक्सका रमिशा श्रेष्ठलाई ४ः१ को स्पिलट डिसिजनको आधारमा तथा शेर्माले आर्मीका आरती बम्जनलाई ४ः१ अंक (स्पिलट डिसिजन) को आधारमा पराजित गर्दै फाइनलमा प्रवेश गर्न सफल भएको थियो ।

५२ केजीमा अन्जनी तेली, ५४ केजीमा मिनु गुरुङ, फेदर वेट ५७ केजीमा चन्द्र कला थापा, ६० केजीमा संगिता सुनार र मिडिल वेट ७५ केजीमा सरस्वती रानामगर छनोट हुन सफल भएका छन् ।

नेपाल बक्सिङ संघले महिला ४८ केजी तौल समुहमा थाइल्याण्डको बैंककमा भएको एएसबिसी यू–२२ एशियन च्याम्पियनसिपमा रजत पदक विजेता सुस्मा तामाङलाई संघको निर्णय अनुसार यसअघि नै छनोट गरिसकेको र आइबा वल्र्ड वुमन्स बक्सिङ च्याम्पियनसिपका लागि ७ जना खेलाडी छनोट भएको संघका प्रवक्ता श्यामकाजि अवालेले जानकारी गराए ।

उनका अनुसार छनोट भएका खेलाडीहरु मध्येबाट उत्कृष्ट खेलाडीले मात्र च्याम्पियनसिपमा सहभागिता जनाउन पाउनेछ । आइबा वल्ड वुमन्स बक्सिङ च्याम्पियनसिप २०२३ भारतकाे दिल्लीमा मार्च १३ देखि २७ तारिखसम्म सञ्चालन हुँदैछ ।