ललितपुर (हाम्रो खेलकुद) – होङ्गान्जी न्यु डायमण्ड युथ स्पोर्ट्स क्लबमाथि रोमाञ्चक र प्रतिस्पर्धात्मक जित निकाल्दै विभागीय नेपाल एपीएफ क्लब मेयर कप खुल्ला महिला तथा पुरुष भलिबल प्रतियोगिताको महिलातर्फ सेमिफाइनलमा प्रवेश गरेको छ ।

एपीएफले डायमण्डमाथि ३–२ को रोमाञ्चक जित निकाल्दै समूह विजेता बनेको हो । ललितपुरको जावलाखेलस्थित जावलाखेल भलिबल प्रशिक्षण केन्द्रको कभर्डहलमा बुधबार भएको खेलमा एपीएफले डायमण्डमाथि १७–२५, २५–१९, २३–२५, २५–२० र १५–१० को संघर्षपुर्ण र रोमाञ्चक जित निकाल्न सफल भयो ।

जितसँगै एपीएफ समूह ‘बी’ को विजेता बन्दा हारका बावजुत डायमण्ड समूहको उपविजेता बनेर सेमिफाइनलमा पुगेको छ । एपीएफले ३ खेलबाट ८ अंक बटुल्दा डायमण्डले ७ अंक बटुल्यो । यो समूहबाट आयोजक ललितपुर महानगरपालिका र परोपकार गल्स होस्टेल प्रतियोगिताबाट बाहिरिएको छ ।

यससँगै प्रतियोगिताको महिलातर्फको सेमिफाइनल समिकरण पूरा भएको छ । अब एपीएफले बिहीबार हुने सेमिफाइनलमा त्रिभुवन आर्मी क्लबसँग तथा न्यु डायमण्डले नेपाल पुलिस क्लबसँग खेल्नेछ ।

पुरुषतर्फ एपीएफले पाटन मल्टिपल क्याम्पसलाई २५–१७, २५–१० र २५–१८ को सोझो सेटमा हराएको छ । अर्को खेलमा त्रिभुवन आर्मी क्लबले ललितपुर महानगरपालिकालाई २५–११, २५–१७ र २५–२१ ले पराजित गरेको छ ।

ललितपुर महानगरपालिकाको आयोजना र जावलाखेल भलिबल प्रशिक्षण केन्द्रको ब्यवस्थापन रहेको १६ बैशाखसम्म चल्ने प्रतियोगितामा पुरुषतर्फ ८ र महिलामा ७ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । लिगकम नकआउटका आधारमा हुने प्रतियोगिताको शीर्ष दुई टोली सेमिफाइनलमा पुग्नेछन् ।

विजेताले समान २ लाख, उपविजेताले १ लाख र तेस्रो हुनेले ५० हजार रुपैयाँ पुरस्कार प्राप्त गर्नेछन् । सर्वोत्कृष्ट खेलाडीलाई जनही १० हजार र विधागततर्फको उत्कृष्ट खेलाडीलाई जनही ५ हजार रुपैयाँ दिईने आयोजकले जनाएको छ ।