ललितपुर (हाम्रो खेलकुद) – विभागीय टोलीद्धय नेपाल पुलिस क्लब र नेपाल एपिएफ क्लब ललितपुरमा जारी मेयर कप खुल्ला महिला तथा पुरुष भलिबल प्रतियोगिताको महिलातर्फ फाइनलमा प्रवेश गरेको छ ।

पुलिसले होङ्गान्जी न्यु डायमण्ड युथ स्पोर्ट्स क्लबलाई तथा एपिएफले त्रिभुवन आर्मी क्लबलाई पराजित गर्दै फाइनलमा भेट पक्का गरेको हो ।

ललितपुरको जावलाखेलस्थित जावलाखेल भलिबल प्रशिक्षण केन्द्रको कभर्डहलमा बिहीबार भएको पहिलो सेमिफाइनलमा पुलिसले डायमण्डमाथि २५–१६, २५–१४ र २५–१७ को सोझो सेटमा जित निकाल्दै फाइनलमा पुग्न सफल भयो ।

अर्काे सेमिफाइनलमा एपिएफले आर्मीमाथि ३–२ को रोमाञ्चक र प्रतिस्पर्धात्मक जित निकाल्दै फाइनलमा पुलिससँगको भेट पक्का गर्यो । रोमाञ्चक र प्रतिस्पर्धात्मक बनेको खेलको सुरुवाती दुई सेट एपिएफले २५–२१ र २५–२२ ले जित्न सफल भएको थियो ।

त्यसपछिको दुई सेट आर्मीले २५–१२ र २६–२४ ले जितेपछि खेल पाँचौं सेटमा लम्विन पुगेको थियो । निर्णायक तथा पाँचौ सेटमा एपिएफ १५–१२ को सेटमा विजयी भयो । डायमण्ड र आर्मीले शुक्रबार तेस्रो स्थानको लागि प्रतिस्पर्धा गर्नेछ ।

पुरुषतर्फ नेपाल पुलिस क्लबले एपीएफ क्लबलाई २८–२६, २५–२१, १८–२५ र २५–१८ को सेटमा हराएर समूह ‘बी’ को विजेता बनेको छ । हारका बावजुत एपिएफ समूह विजेता बनेको छ ।

पुरुषतर्फ नै ललितपुर महानगरपालिकाले सुर्य विनायक युथ क्लबलाई २५–११, २५–१० र २५–१४ को सोझो सेटमा हराएर ललितपुर समूह ‘ए’ को उपविजेता बन्दै सेमिफाइनलमा पुगेको छ ।

यससँगै प्रतियोगिताको पुरुषतर्फको सेमिफाइनल समिकरण पूरा भएको छ । सेमिफाइनलमा त्रिभुवन आर्मी क्लब र एपीएफ तथा पुलिस र ललितपुर महानगरपालिकाबीच प्रतिस्पर्धा हुनेछ । दुबै सेमिफाइनल शुक्रबार हुनेछ । महिला र पुरुषको फाइनल शनिबार हुनेछ ।

ललितपुर महानगरपालिकाको आयोजना र जावलाखेल भलिबल प्रशिक्षण केन्द्रको ब्यवस्थापन रहेको १६ बैशाखसम्म चल्ने प्रतियोगितामा पुरुषतर्फ ८ र महिलामा ७ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । लिगकम नकआउटका आधारमा हुने प्रतियोगिताको शीर्ष दुई टोली सेमिफाइनलमा पुग्नेछन् ।

विजेताले समान २ लाख, उपविजेताले १ लाख र तेस्रो हुनेले ५० हजार रुपैयाँ पुरस्कार प्राप्त गर्नेछन् । सर्वोत्कृष्ट खेलाडीलाई जनही १० हजार र विधागततर्फको उत्कृष्ट खेलाडीलाई जनही ५ हजार रुपैयाँ दिईने आयोजकले जनाएको छ ।