ललितपुर (हाम्रो खेलकुद) – त्रिभुवन आर्मी क्लबका ओपन स्पाइकर मान बहादुर श्रेष्ठ र नेपाल पुलिस क्लबकी स्पाइकर लक्ष्मी चन्द ललितपुरमा भएको मेयर कप खुल्ला महिला तथा पुरुष भलिबल प्रतियोगितामा सर्वाेत्कृष्ट खेलाडी घोषित भएका छन् ।

मान बहादुर पुरुषमा तथा लक्ष्मी महिलामा सर्वाेत्कृष्ट खेलाडी घोषित भएका हुन् । मान बहादुर र लक्ष्मीले आ–आफ्नो टोलीलाई मेयर कप खुल्ला महिला तथा पुरुष भलिबल प्रतियोगितामा च्याम्पियन बनाउन महत्वपूर्ण भुमिका निर्वाह गरेका थिए । सर्वाेत्कृष्ट बनेसँगै मान बहादुर र लक्ष्मीले ट्रफीसहित १० हजार रुपैयाँ प्राप्त गरेका छन् ।

ललितपुरको जावलाखेलस्थित जावलाखेल भलिबल प्रशिक्षण केन्द्रमा शनिबार भएको पुरुषतर्फको फाइनलमा आर्मीले नेपाल पुलिस क्लबलाई २५–२०, २५–१७, २७–२९, १९–२५ र १५–७ ले तथा महिलातर्फ पुलिसले एपिएफलाई २५–११, १९–२५, २५–१९ र २५–२२ को सेटमा पराजित गर्दै उपाधि जित्न सफल भएको थियो ।

उपाधिसँगै विजेता आर्मी र पुलिसले ट्रफीसहित समान २ लाख रुपैयाँ प्राप्त गरेको छ । उपविजेता बनेका पुलिस र एपीएफले समान एक लाख रुपैयाँ पाएको छ ।

पुरुषतर्फ पुलिसका बिशाल बिक उत्कृष्ट स्पाइकर, पुलिसका द्धारिका थापा उत्कृष्ट ब्लकर, एपीएफका लोकेन्द्र गिरी उत्कृष्ट सेटर, आर्मीका इश्वर थापा उत्कृष्ट लिवेरो, आर्मीका हरि हजुर थापा उत्कृष्ट सर्भर र आर्मीका जगत बहादुर सिंह उत्कृष्ट पं्रशिक्षक घोषित भए ।

महिलामा एपीएफकी आरती सुबेदी उत्कृष्ट स्पाइकर, न्यु डायमण्ड क्लबकी सुमित्रा रेग्मी उत्कृष्ट ब्लकर, एपीएफकी जस्ना महतो उत्कृष्ट सेटर, पुलिसकी यमुना रसाईली उत्कृष्ट लिवेरो, आर्मीकी श्रृष्टि खड्गी उत्कृष्ट सर्भर र पुलिसका रुपेश कुमार विष्ट उत्कृष्ट प्रशिक्षक घोषित भए । विधागततर्फका उत्कृष्ट खेलाडीले ट्रफीसहित जनही ५ हजार रुपैयाँ प्राप्त गरे ।

विजयी टोली तथा खेलाडीलाई ललितपुर महानगरपालिकाका मेयर चिरीबाबु महर्जन र जावलाखेल भलिबल प्रशिक्षक केन्द्रका अध्यक्ष माधव खड्कालगायतले पुरस्कृत गरे ।

ललितपुर महानगरपालिकाको आयोजना र जावलाखेल भलिबल प्रशिक्षण केन्द्रको ब्यवस्थापनमा ९ बैशाखबाट शुरु भएको प्रतियोगितामा पुरुषतर्फ ८ र महिलामा ७ टोलीको सहभागिता रहेको थियो । सहभागी टोलीलाई दुई समूहमा विभाजन गरि लिगकम नकआउटका आधारमा प्रतिस्पर्धा गराइएको थियो ।

प्रतियोगिताका सर्वाेत्कृष्टहरु
सर्वाेत्कृष्ट – मानबहादुर श्रेष्ठ (पुरुष– आर्मी) र लक्ष्मी चन्द (महिला – पुलिस)
स्पाइकर – विशाल विक (पुरुष – पुलिस) र आरती सुवेदी (महिला– एपिएफ)
ब्लकर – द्धारिका थापा (पुरुष– पुलिस) र सुमित्रा रेग्मी (महिला – न्यु डायमण्ड)
सेटर – लोकेन्द्र गिरी (पुरुष – एपिएफ) र जस्ना महतो (महिला – एपिएफ)
सर्भर – हरि हजुर थापा (पुरुष– आर्मी) र श्रृष्टि खड्गी (महिला – आर्मी)
लिवेरो – ईश्वर थापा (पुरुष – आर्मी) र यमुना रसाइली (महिला – पुलिस)
प्रशिक्षक – जगत बहादुर सिंह (पुरुष– आर्मी) र रुपेश कुमार विष्ट (महिला – पुलिस)