पाल्पा (हाम्रो खेलकुद) – दोहोरो जित निकाल्दै गण्डकी प्रदेश राष्ट्रिय पुरुष बिच भलिबल प्रतियोगिताको क्वाटरफाइनलमा प्रवेश गरेको छ ।

पाल्पा तानसेनको रानीमहलनजिकै कालीगण्डकी नदीको किनारमा बिहीबारदेखि शुरु भएको प्रतियोगितामा गण्डकीले आयोजक सन्जय मेमोरियल फाउन्डेसन र बागमती प्रदेशलाई समान २–० को सोझो सेटमा पराजित गरी अन्तिम आठमा पुग्न सफल भएको हो ।

आयोजक सन्जय मेमोरियलमाथि २१–११ र २१–१५ को जित निकालेको गण्डकीले बागमतीमाथि २१–१६ र २१–१५ को सहज जित निकाल्न सफल भयो । दोहोरो जितसँगै गण्डकी समूह ‘बी’ को विजेता बन्यो । अब यो समूहबाट आयोजक सन्जय र बागमतीबीचको विजेता उपविजेता बनेर क्वाटरफाइनलमा पुग्नेछ ।

यस्तै विभागीय त्रिभुवन आर्मी क्लबले पनि विजयी शुरुवात गरेको छ । आर्मीले लुम्बिनीमाथि २१–१५ र २१–११ को सेटमा जित निकाल्यो । आर्मीसँग पराजित लुम्बिनीले भने सुदूरपश्चिम प्रदेशबाट वाकओभर पायो । सुदूरपश्चिम प्रदेश समयमै कोर्टमा नपुगेपछि लुम्बिनी विजेता बन्यो ।

प्रतियोगिताको बिहीबार तानसेन नगरपालिकाका प्रमुख सन्तोषलाल श्रेष्ठले उद्घाटन गर्दै रानीमहललाई बिच भलिबलको हब बनाउने लिखित प्रतिबद्धता समेत जनाए ।

सञ्जय मेमोरियल फाउन्डेसनको आयोजनामा बिहीबारदेखि शुरु भएको प्रतियोगिता शनिबारसम्म चल्नेछ । प्रतियोगितामा ६ प्रदेश, तीन विभागीय टोली र आयोजक गरि १० टोलीको सहभागिता रहेको छ ।

प्रतियोगिताको विजेता टिमले १ लख ५० हजार रुपैयाँ सहित ट्रफी, मेडल प्राप्त गर्नेछ । उपविजेता टिमले १ लाख रुपैयाँ सहित ट्रफी, मेडल, तेस्रो हुने टिमले ५० हजार रुपैयाँ सहित ट्रफी, मेडल र सानत्वना हुने टिमले २५ हजार रुपैयाँ प्राप्त गर्नेछन् ।

प्रतियोगिताको सर्वोत्कृष्ट खेलाडीले ट्रफी सहित १० हजार रुपैयाँ प्राप्त गर्नेछ ।