काठमाडौं (हाम्रो खेलकुद) – सशस्त्र प्रहरी बल नेपाल (एपिएफ) क्लबको आयोजनामा प्रथम महानिरीक्षक कृष्णमोहन श्रेष्ठको स्मृतिमा आयोजना हुँदै आएको राष्ट्रब्यापी खुल्ला ब्याडमिन्टन प्रतियोगिताको १६औं संस्करण जेठ तेस्रो साता आयोजना हुने भएको छ ।

आयोजक नेपाल एपिएफ क्लबले एपिएफ मुख्यालय हल्चोकमा पत्रकार सम्मेलन गरी प्रतियोगिता जेठ २१ देखि २४ गते सम्म एपिएफ मुख्यालय हल्चोकमै हुने सशस्त्र प्रहरी बलका प्रवक्ता तथा बरिष्ठ उपरिक्षक राजेन्द्र खड्काले जानकारी गराए ।

२०६० बाट निरन्तर भइरहेको प्रतियोगिता कोरोना भाइरस (कोभिड–१९) का कारण २०६५ देखि हुन नसकेको र यसपटकबाट निरन्तर हुने प्रवक्ता खड्काले बताए ।

राष्ट्रिय वरीयता प्रतियोगितासमेत रहेको प्रतियोगितामा पुरुष–महिला एकल र युगल, मिक्स युगल, पुरुष यु–१२ र यु–१९, भेट्रान्स युगल ४५ र ५५ बर्षमाथि तथा अन्तर सरकारी सेवा (बहाल तथा निबृत्त) ३५ बर्ष माथि गरि १० विधामा प्रतिस्पर्धा हुनेछ ।

एक खेलाडीमा बढीमा चार इभेन्ट्समा सहभागिता जनाउन पाउनेछन् । एक इभेन्ट्समा ८ टोली नभएमा उक्त इभेन्ट्समा प्रतिस्पर्धा नहुने एपिएफले जनाएको छ ।

कुल ८ लाख, ६५ हजार पुरस्कार रासी रहेको प्रतियोगितामा पुरुष र महिला एकलका विजयी शीर्ष तीनका खेलाडीहरुले नगद ७० हजार, ३५ हजार र २५ हजार प्राप्त गर्ने छन् । यस्तै युगलतर्फ पहिलो हुनेले नगद ५५ हजार, दोश्रो हुनेले नगद ३० हजार र तेस्रो हुनेले नगद २० हजार प्राप्त गर्नेछन् ।

यस्तै ब्वाईज १२ र १९ बर्ष मुनिका शिर्ष तीन स्थान प्राप्त गर्ने खेलाडीहरुले नगद २५ हजार, १५ हजार र १० हजार प्राप्त गर्नेछन् । मिक्स युगलतर्फ प्रथमले ५० हजार, दोश्रोले ३० हजार र तेस्रोले २० हजार प्राप्त गर्नेछन् ।

भेट्रान्स तर्फका दुवै समूह र अन्तर सरकारी सेवाका शीर्ष तीन स्थान प्राप्त गर्ने खेलाडीहरुले प्रथम हुनेले नगद ३० हजार, दोश्रो हुनेले २० हजार र तेस्रो हुनेले १५ हजार नगद प्राप्त गर्नेछन् । यसका साथै मेडल, ट्रफी र प्रमाण पत्र प्राप्त गर्नेछन् ।

कार्यक्रमलाई फर्मुला प्लस ईभेन्ट्स एवं एडभर्टाईजिङ प्रालि, नेपाल ब्याडमिन्टन संघ (प्राविधिक सहयोग), बागमती प्रदेश, योनेक्स सनराईज नेपाल, एपिएफ मेम्बर्स सोसाईटीले समन्वय र सहकार्य गरेको छ । साथै पत्रकार सम्मेलनमा १२औं सहवीर स्मृति खुल्ला राष्ट्रिय लन टेनिस प्रतियोगिता भदौमा सञ्चालन गरिने जानकारी गराएको छ ।