मकवानपुर (हाम्रो खेलकुद) – हेटौंडामा भएको खुला पुरुष भलिबल प्रतियोगिताको उपाधि सशस्त्र प्रहरी बलको नेपाल एपीएफ क्लबले जितेको छ ।

मकवानपुरको हेटौंडा–४, हुप्रचौरस्थित भलिबल कोर्टमा भएको फाइनलमा शनिबार विभागीय टोली त्रिभुवन आर्मी क्लबलाई ३–१ को सेटमा पराजित गर्दै एपिएफले उपाधि जित्न सफल भएको हो ।

एपीएफले पहिलो सेट २५–२० ले आफ्नो पक्षमा पारेको थियो । दोस्रो सेट १७–२५ ले गुमाएको एपिएफले त्यसपछिको दुवै सेट २५–१७ र २९–२७ ले आफ्नो पक्षमा पार्दै उपाधि जित्न सफल भयो ।

उपाधीसँगै एपीएफले २ लाख रुपैयाँ प्राप्त गरेको छ । उपविजेता आर्मीले १ लाख रुपैयाँमा हात पारेको छ । प्रतियोगिताको सर्वोत्कृष्ट खेलाडी एपीएफका विजयी थापा घोषित भए । उनले १५ हजार रुपैयाँ प्राप्त गरे ।

प्रतियोगिताको उत्कृष्ट सेटर एपीएफका सुबास कुँवर, उत्कृष्ट स्पाइकर आर्मीका शरण सामरी, उत्कृष्ट डिफेन्ड आर्मीका इश्वर थापा, उत्कृष्ट ब्लकर आर्मीका सञ्जय चौधरी र उत्कृष्ट प्रशिक्षक एपीएफका पुष्प मल्ल घोषित भए । विधागत उत्कृष्टले समान ५ हजार रुपैयाँ प्राप्त गरे ।

सेमिफाइनलमा पराजित गण्डकी प्रदेश र नेपाल पुलिस क्लबले समान ५० हजार रुपैयाँ प्राप्त गरेको छ । केशवलाल श्रेष्ठ स्मृति केन्द्रीय प्रतिष्ठान नेपाल र मकवानपुर जिल्ला भलिबल संघको संयुक्त आयोजनामा प्रतियोगिता भएको हो ।

स्वर्गीय केशवलाल श्रेष्ठ स्मृति केन्द्रीय प्रतिष्ठान र मकवानपुर जिल्ला भलिबल संघको संयुक्त आयोजनामा गत जेठ १६ गतेबाट संचालन भएको प्रतियोगिता राष्ट्रिय र मोफसलका गरी १० टिमले सहभागिता जनाएका थिए ।