काठमाडौं (हाम्रो खेलकुद) – नेपाल एपिएफ क्लबका प्रिन्स दाहाल र त्रिभुवन आर्मी क्लबका रुकेश महर्जन १६औं राष्ट्रव्यापी कृष्णमोहन स्मृति खुुल्ला ब्याडमिन्टन प्रतियोगिता–२०८० को क्वाटरफाइनलमा प्रवेश गरेका छन् ।

नेपाल एपीएफ क्लबको आयोजनामा सशस्त्र प्रहरी बल नेपालको प्रधान कार्यालय हल्चोकस्थित नेपाल एपीएफ क्लबको कभर्ड हलमा मंगलबार भएको प्रि–क्वाटरफाइनलमा प्रिन्सले आर्मीका कबिर केसीलाई २१–७ र २१–१२ ले पराजित गरी असन्तम आठमा स्थान पक्का गरेका हुन् ।

यस्तै आर्मीका रुकेश महर्जनले एपीएफका अमन महर्जनलाई २१–१७ र २१–१७ ले पराजित गरे । यस्तै एफिएफका देवराज राना, पुलिसका सुनिल जोशी, एपीएफका क्षितिज खनाल, पुलिसका जीवन आचार्य, पूर्ण बहादुर थापा र बिष्णु कटुवालले पनि अन्तिम आठको यात्रा तय गरेका छन् ।

गल्र्स सिंगलतर्फ भोजपुरका नङ्सलदेवी तामाङले कस्तुरी कलेजकी सीमा राजवंशीलाई २१–१२ र २१–१६, एपीएफकी जेशिका गुरुङले आर्मीकी रिहाना शेरचनलाई २१–८ र २१–६, आर्मीकी अनुमाया राईले एपीएफकी रिना तामाङलाई २१–१७ र २९–२७, एपीएफकी सुनैना मुखियाले आर्मीकी बिस्ना बिष्टलाई १६–२१, २१–१३ र २१–१८ ले पराजित गरेका छन् ।

यस्तै एपीएफकी शोभा गौचनले आर्मीकी सिस्ना सीर्पालीलाई २१–१३ र २१–१३, आर्मीकी अमिता गिरीले काभ्रेकी सायरा प्रधानलाई २१–५ र २१–३, पुलिसकी नीता लम्सालले सर्लाहीकी निकिता लामालाई २१–१२ र २१–१७, आर्मीकी रशिला मर्हजनले एपीएफकी अन्जना राईलाई २१–११ र २१–१२ ले पराजित गरी अर्को चरणमा प्रवेश गरेका छन् ।

यसैगरी ब्वाईज अन्डर १२ तर्फ आर्मीका सुदेश राजकोटी, कैलालीका आदित्य चौधरी, एपीएफका सफल भुजेल, सुहम कार्की, दिपक व्याडमिन्टन एकेडेमीका देयोन भण्डारी, आर्मीका रिजन मगर, दाङका ज्योती आदित्य चौधरी र एपीएफका आरुष सिंखडा अर्को चरणमा प्रवेश गरेका छन् ।