काठमाडौं (हाम्रो खेलकुद) – नेपाली पुरुष राष्ट्रिय भलिबल टोलीले किर्गिस्तानमा जारी काभा पुरुष भलिबल नेसन्स लिगमा आज (बिहीबार) लिग चरणको तेस्रो खेलमा तुर्केमिनिस्तानसँग प्रतिस्पर्धा गर्दैछ ।

नेपाल र तुर्केमिनिस्तानबीचको खेल नेपाली समयअनुसार साँझ ५ः४५ बजेपछि विस्केकस्थित चोलपोन एटिए कभर्डहलमा हुनेछ । यसअघिको तीन खेलमा हार बेहोरेको नेपाल तुर्केेमिनिस्तानलाई पराजित गर्दै लिगमा पहिलो जितको खोजीमा हुनेछ ।

नेपाल पहिलो खेलमा मंगोलिया र दोस्रो खेलमा घरेलु टोली किर्गिस्तानसँग समान ३–१ को सेटमा पराजित हुँदा तेस्रो खेलमा एसियाकै पावर हाउस इरानसँग ३–० को सोझो सेटमा पराजित भएको थियो ।

टोलीसँगै कप्तान हरि हजुर थापासँगै मान बहादुर श्रेष्ठ, हेमन्त बहादुर मल्ल, दुर्गा बहादुर खड्का, हरि अधिकारी, धन बहादुर भट्ट क्षेत्री, टेक राज अवस्थी, रविन चन्द र भीम गाहा छन् । यस्तै टोलीसँग राजेन्द्र विष्ट, लोकेन्द्र गिरी र सफल विक पनि टोलीमा छन् ।

यता, तुर्केमिनिस्तान पनि नेपाललाई हराएर लिगमा पहिलो जितको खोजीमा हुनेछ । तुर्केमिनिस्तानले पनि तीन खेलमा हार बेहोरेको छ । तुर्केमिनिस्तानले किर्गिस्तानको दोस्रो टोली, मंगोलिया र किर्गिस्तानसँग समान ३–१ को सेटमा पराजित भएको छ ।

अब नेपालले शुक्रबार किर्गिस्तानको दोस्रो टोली तथा आइतबार उज्वेकिस्तानसँग अन्तिम खेल खेल्नेछ ।