काठमाडौैं (हाम्रो खेलकुद) – नेपाली पुरुष राष्ट्रिय भलिबल टोलीका डच प्रशिक्षक हान एबिङ नेपाल आइपुगेका छन् । नेपाली पुरुष भलिबल टोलीलाई प्रशिक्षण दिन उनी शुक्रबार नेपाल आइपुगेका हुन् ।

उनलाई प्रशिक्षक जगदिश प्रसाद भट्ट र रुपेश विष्टले त्रिभुवन अन्तर्राष्ट्रिय विमानस्थलमा स्वागत गरे । प्रशिक्षक एविङको प्रशिक्षणमा नेपालले चीनमा आयोजना हुने १९औं एसियाली खेलकुद र श्रीलंकामा आयोजना हुने पुरुष भलिबल च्यालेन्ज कप खेल्नेछ । प्रशिक्षक एविङले यसअघि पनि नेपाली पुरुष टोलीलाई प्रशिक्षण दिइसकेका छन् ।

राष्ट्रिय खेलकुद परिषद (राखेप) र विश्व भलिबल महासंघ –फिव) को सहयोगमा उनी नेपाली टोलीलाई प्रशिक्षण दिन नेपाल आईपुगेका हुन् ।

नेपाल भलिबल संघले चीनमा हुने एसियाडका लागि १२ सदस्यीय टोली घोषणा गरिसकेको छ । टोलीलाई महिला टोलीका बेल्जियन प्रशिक्षक जान डे ब्रान्टले पनि प्रशिक्षण दिइरहेका छन् । यानलाई प्रशिक्षक जगदिश प्रसाद भट्ट र रुपेश विष्टले सहयोग गरिरहेका छन् ।

हानको प्रशिक्षणमा नेपालले दुईपटक सेन्ट्रल जोन भलिबल च्याम्पियनसिप र १३औं दक्षिण एसियाली खेलकुद (साग) खेलिसकेका छन् ।

समूह विभाजन

• समूह ए : चीन, किर्गिस्तान, कजाकस्तान
• समूह बी : इरान, नेपाल, बहराइन
• समूह सी : दक्षिण कोरिया, भारत, कम्बोडिया
• समूह डी : चाइनिज ताइपेइ, पाकिस्तान, मंगोलिया
• समूह ई : कतार, थाइल्याण्ड, हङकङ चीन
• समूह एफ : जापान, इन्डोनेसिया, फिलिपिन्स, अफगानिस्तान

नेपालले पछिल्लो दुई महिनादेखि एसियाली खेलकुदको लागि तयारी गरिरहेको छ । गत महिना नेपालले काभा नेसन्स लिगमा सहभागिता जनाएकाे थियाे । तर नेपालको लागि नतिजा भने सन्तोषजनक रहेन । नेपालले सबै खेलमा हार बेहोरेको थियो ।

एसियाली खेलकुदका लागि नेपालको अन्तिम टोली:

मानबहादुर श्रेष्ठ (कप्तान), रविन चन्द, विशाल विक, टेकराज अवस्थी, धिरज काजी बस्नेत, हेमन्त मल्ल, लोकेन्द्र गिरि, सम्राट भण्डारी, विनोद चन्द, दुर्गा बहादुर खड्का, सफल विक र मनिष मानन्धर