एजेन्सी – भारतीय प्रशिक्षक भिभिएस लक्ष्मणले नेपाली क्रिकेट टोलीका कप्तान रोहित पौडेलको कप्तानीको प्रशंसा गरेका छन् । चीनमा जारी १९ औं एसियाली खेलकुद (एसियाड) मा भारतसँग २३ रनको हारेपछि नेपालको ड्रेसिङ रुममा आउँदै उनले रोहितको कप्तानीको प्रशंसा गरेका हुन् ।

‘रोहितको राम्रो कप्तानी । उनले टोलीलाई राम्रोसँग नेतृत्व गरे । टोलीमा जोश थियो र एक भएर खेलिरहेका थिए । र भिड्ने शक्ति लगातार देख्न पाइरह्यौं’, लक्ष्मणले भने ।

उनले नेपाली टोलीलाई टिप्स पनि दिएका छन् । ‘जुनसुकै क्रिकेटमा सफलता प्राप्त गर्न टोलीको अघि बढ्ने चाह हुनुपर्छ । निरन्तर भिड्ने क्षमता हुनुपर्छ । अझ दबाबमा हुँदा धेरै चाहिन्छ, जुन नेपालमा देखिएको थियो’, खेलपछि उनले भने ।

त्यसैमा उनले थपे, ‘त्यो नेपालको ब्याटिङ मात्र नभएर बलिङमा पनि देखिएको थियो । जब कुनै अ‍ोभर महँगो हुन्थ्यो अर्को बलर आएर गति रोक्थे ।’

रोहितको कप्तानीमा नेपालले आइसिसी विश्वकप लिग २ मा १२ मध्य ११ खेल जितेर ओडिआई मान्यता जोगाएको थियो । त्यस्तै विश्वकप छनोटमा स्थान र प्रिमियर कप जित्दै भारत र पाकिस्तानसँग पहिलो पटक खेलेको थियो । नेपाल एसिया कपमा भारतसँग १० विकेटले पराजित भएपनि प्रदर्शनलाई लिएर चौतफी प्रसंशा भएको थियो ।

त्यस्तै १९ औं एसियाली खेलकुदमा पनि रोहितको कप्तानीमा नेपालले मंगोलियाविरुद्ध एक दर्जन भन्दा बढी विश्व कीर्तिमान बनाएको थियो । तर क्वाटरफाइनलमा भारतसँग पराजित हुँदै बाहिरिएको थियो । भारतसँग पराजित भएपनि नेपाली टोलीको प्रदर्शनलाई लिएर चौतर्फी प्रसंशा हुँदै आएको छ ।

रोहित गतवर्ष नेपाली क्रिकेट टोलीको कप्तानमा नियुक्त भएका थिए । उनको कप्तानीमा नेपालले सानदार प्रदर्शन गर्दै आएकोछ । सबैभन्दा कमजोर मानिने ब्याटिङनै टोलीको खुख्य हतियार बनेको छ । टिमलाई एकता बनाउन सफल भएका रोहितले नेपाली टोलीमा लगातार खेलाडी परिवर्तन गर्ने समस्या पनि अन्त्य गरेका छन् ।