काठमाडौं (हाम्रो खेलकुद) – अष्ट्रेलियाको सिड्नीमा आयोजना हुन लागेको प्रथम अजी फाइनान्स अन्तर्राष्ट्रिय पुरुष भलिबल कपको सम्पूर्ण तयारी पूरा भएको छ ।

आयोजक द गोर्खा स्पोर्ट्स क्लब अष्ट्रेलियाका अध्यक्ष दिपेन राईले भाेलि आइतबार हुने पहिलो संस्करणको प्रतियोगिताको सम्पूर्ण तयारी पूरा भएको जानकारी गराएको छ ।

प्रतियोगितामा नेपाली समुदायका विभिन्न १४ टोलीको सहभागिता रहेकाे छ । सहभागी टोलीलाई दुई समूहमा विभाजन गरिएको छ ।

समूह ‘ए’ मा वेस्टर्न सिड्नी क्लब, गल्कोट समाज अष्ट्रेलिया, पोखरा भलिबल क्लब, मोना म्याग्दी, सनराइज युथ क्लब, म्याग्दी काली युनाइटेड क्लब र क्यानबेरा भलिबल क्लब रहेका छन् ।

समूह ‘बी’ मा गोल्डेन ब्वाइज क्लब, पर्वत बेनी क्लब, आयोजक गोर्खा स्पोर्ट्स क्लब ‘ए’, ढोरपाटन स्पोर्ट्स क्लब, जलजला परिवार अष्ट्रेलिया, गोर्खा स्पोर्ट्स क्लब ‘बी’ र छन्त्याल परिवार अष्ट्रेलिया रहेका छन् । खेलहरु नकआउटको आधारमा हुनेछ । क्लबको बार्षिकोत्सव, क्रिसमस र अंग्रेजी नयाँ वर्षको अवसरमा हुन लागेको एक दिने प्रतियोगिता अष्ट्रेलियाको नेसनल स्पोर्ट्स हल लाकेम्वामा हुनेछ ।

प्रतियोगिताको विजेताले ३ हजार ५ अष्ट्रेलियन डलरसँगै कप मेडल र प्रमाणपत्र प्राप्त गर्नेछ । दोस्रो हुनेले १ हजार ५ सय ५ अष्ट्रेलियन डलर र तेस्रो हुने टोलीलाई ५ सय ५ अष्ट्रेलियन डलरसँगै कप मेडल र प्रमाणपत्र प्राप्त गर्ने आयोजकले जनाएको छ ।

सर्वाेत्कृष्ट खेलाडीले ट्रफीसँगै १ सय अष्ट्रेलियन डलर तथा व्यक्तिगत विधा उत्कृष्ट स्पाइकर, सेटर, ब्लकर, डिफेन्डर र प्रशिक्षकसँगै उदियमान खेलाडी र अनुशाषित खेलाडीले ट्रफीसँगै ५० अष्ट्रेलियन डलर प्राप्त गर्ने आयोजकले जनाएको छ ।

प्रतियोगितालाई अजी फाइनान्स एण्ड होम लोनले मुख्य प्रायोजन गरेको छ । यस्तै प्रतियोगितालाई एक्सपर्ट एजुकेसन एण्ड भिजा सर्भिसेस, रे पोपर्टी, फिस एट दि रक्स प्लाटिनम र नमस्ते रेष्ट्ररेन्ट, एभरेस्ट ड्राइभिङ र यात्री फुड रकले प्रायोजन गरेका छन् ।