बागलुङ (हाम्रो खेलकुद) – विभागीय टोली त्रिभुवन आर्मी क्लबका ओपन स्पाइकर मान बहादुर श्रेष्ठ बुकी कप भलिबल २०८० मा सर्वाेत्कृष्ट खेलाडी घोषित भएका छन् ।

नेपाल पुलिस क्लबविरुद्ध सोमबार भएको फाइनलमा आर्मीलाई च्याम्पियन बनाउन क्रममा मान बहादुरले अलराउन्ड प्रदर्शन गरेका थिए ।

नेपाली पुरुष राष्ट्रिय भलिबल टोलीका कप्तान समेत मानबहादुर सहितको टोलीले अर्को विभागीय टोली पुलिसमाथि ३–२ को रोमाञ्चक जित निकालेको थियो । मान बहादुरले २५ हजार रुपैयाँ प्राप्त गरे ।

यस्तै गल्कोट समाज जापानका वरिष्ठ उपाध्यक्ष, नेपाल भलिबल संघ जापान तथा गल्कोट स्पोर्ट्स क्लब जापनका पुर्व अध्यक्ष, समाजसेवी व्यक्तित्व रत्न सिंह बस्नेत र घुम्टे युवा परिवार जापान शाखाका अध्यक्ष, गल्कोट स्पोर्ट्स क्लबका महासचिव दिनेश थापाले आर्मीका मान बहादुर र पुलिसका सफल विकलाई विशेष पुरस्कारले सम्मानित गरे ।

पुलिसका पहल गहतराज (टर्की) उत्कृष्ट स्पाइकर चुनिए । आर्मीका दुर्गा महतो उत्कृष्ट सेटर, पुलिसका सफल विक उत्कृष्ट ब्लकर, पुलिसका रविन नगरकोटी उत्कृष्ट सर्भर, आर्मीका ईश्वर थापा उत्कृष्ट लिवेरो तथा आर्मीका जगत सिंह उत्कृष्ट प्रशिक्षक चुनिए । उत्कृष्ट प्रशिक्षकले १० हजार र अन्य उत्कृष्टले समान ६ हजार रुपैयाँ प्राप्त गरे ।

आर्मी च्याम्पियन
त्रिभुवन आर्मी क्लब बुकी कप भलिबलमा च्याम्पियन बनेको छ । विभागीय डर्बी भिडन्तमा नेपाल पुलिस क्लबमाथि रोमाञ्चक जित निकाल्दै आर्मी विजयी भएको हो । पुलिसलाई ३–२ प्रतिस्पर्धात्मक सेटमा पराजित गर्दै आर्मीले उपाधि जितेको हो ।

बागलुङको गल्कोट नगरपालिका ६ मजुवाफाँटमा सोमबार भएको फाइनलको पहिलो सेटमा आर्मीले २७–२५ को रोमाञ्चक र प्रतिस्पर्धात्मक जित निकाल्न सफल भयो । त्यसपछि आर्मीले दुवै सेट २२–२५ र २१–२५ ले गुमाउन पुग्यो ।

चौथो सेटमा आर्मीले उत्कृष्ट प्रदर्शन गर्दै २७–२५ को पुनरागमन जित निकाल्दै खेललाई पाँचौ सेटमा लम्ब्याए । आर्मी २२–२४ ले पछि रहेपनि त्यसपछि लगातार दुई अंक जोड्दै खेललाई २४–२४ को बराबरीमा ल्याउन सफल भएको थियो । त्यसपछि एक अंक जोड्दै पुलिस च्याम्पियन नजिक पुगेपनि आर्मीले लगातार तीन अंक जोड्दै खेल आफ्नो पक्षमा पार्यो ।

चौथो सेटमै जित नजिक पुगेपनि सेट गुमाएको पुलिसले पाँचौ सेटमा भने फितलो प्रदर्शन गर्यो । अर्काेतर्फ आर्मीले उच्च मनोबलका साथ खेल्दै सेटलाई आफ्नो पक्षमा पार्न सफल भयो ।

पाँचौं सेटमा ४–४ को बराबरीबाट लगातार ४ अंक जोड्दै आर्मीले ८–४ को अग्रता लिदै जिततर्फ अग्रसर बन्यो । त्यसपछि ११–६ को स्थितिबाट आर्मीले लगातार ५ अंक जोड्दै आर्मी च्याम्पियन बन्न सफल भयो । यससँगै आर्मीले लिग चरणमा भोगेको हारको बदला लिन सफल भएको छ ।

प्रतियोगितामा गण्डकी प्रदेशलाई हराउँदै एपिएफ क्लब तेस्रो भएको छ । उपाधिसँगै आर्मीले ५ लाख,पुलिसले २ लाख ५० हजार र एपिएफले १ लाख २५ हजार रुपैयाँ प्राप्त गरेको छ ।

हिमालयन म्युजिकल इभेन्ट म्यानेजमेन्ट एण्ड इभेन्ट्स प्रालिको आयोजनामा पुस ८ गते सुरु भएको प्रतियोगितामा तीन विभागसँगै गण्डकी प्रदेश र गल्कोट नगरपालिकाको सहभागिता थियो ।

प्रतियोगिताको उत्कृष्टहरु

सर्वाेत्कृष्ट – मान बहादुर श्रेष्ठ (आर्मी)
सेटर – दुर्गा महतो (आर्मी)
स्पाइकर – पहल गहतराज (पुलिस)
ब्लकर – सफल विक (पुलिस)
सर्भर – रविन नगरकोटी (पुलिस)
लिवेरो – ईश्वर थापा (आर्मी)
प्रशिक्षक – जगत सिंह (आर्मी)