काठमाडौं (हाम्रो खेलकुद)- नेपाल पुलिस क्लब र आयोजक स्ट्याग च्याम्पियन्स टेबल टेनिस एकेडेमी स्ट्याग ग्लोबल च्याम्पियन्स टेबलटेनिस लिग- सिजन २ मा फाइनलमा प्रवेश गरेका छन् ।

पुलिस फाइनलमा पुगेको दोश्रो पटक हो । गत संस्करणमा स्ट्याग तेश्रो भएको थियो ।

लैनचौरस्थित राष्ट्रिय टेबलटेनिस प्रशिक्षण केन्द्रमा शुक्रवार भएको सेमिफाइनलको पुरुष सिंगल्समा पुलिसका वंश सिंघलले एपिएफका राजीव चिकबञ्जारलाई ११-७, ११-३ र ११-९ को सोझो सेटमा पराजित गरे ।

महिला सिंगल्समा पुलिसकी लक्षिता नारङले एपिएफकी दिया देउलालाई सिधा सेटमा ११–५, ११–२ र ११–८ ले हराइन् ।

मिक्स डबल्समा पुलिसका संयोग कपाली र लक्षिताको जोडीले एपिएफका राजीव र अनिता महर्जनको जोडीलाई ११–८ र ११–४ ले हरायो।

नकआउटमा जुन टोलीले पहिले ८ अंक हासिल गर्छ त्यही टोली विजयी हुने नियम  छ । त्यस आधारमा पुलिस समग्रमा ८-० ले विजयी भयो । १ सेट जितका लागि १ अंक पाउने प्रावधान छ ।

प्रतिस्पर्धात्मक अर्को सेमिफाइनलमा स्ट्यागले यल टेबल टेनिसलाई समग्रमा ८-६ ले पाखा लगायो । पुरुष सिंगल्समा यलका आदर्श ओम क्षेत्रीले स्ट्यागका हमर साङगालाई ११-९, ११-२ र ११-९ ले पन्छ्याउदै यललाई ३-० को अग्रता दिलाए ।

महिला सिंगल्समा प्रहरीकी त्रिशा गोगोइले यलकी मुनमुन कुन्डुमाथि ३-० को सोझो सेटमा जित दर्ता गर्दै खेललाई ३-३ को बराबरीमा ल्याइन् । त्रिशाले ११-६, ११-९ र ११-४ ले खेल जितिन् ।

मिक्स डबल्समा यलका एलेक्स महर्जन र मुनमुनको जोडी विरुद्धको खेलमा स्ट्यागका गनन्जय र त्रिशाको जोडी तीनै सेटमा समान ११-७ को नतिजामा विजयी भयो ।

मिक्स डबल्सको समाप्तिमा स्ट्याग ६-३ ले अगाडि   रह्यो । अर्को पुरुष सिंगल्समा यलका एलेक्सले स्ट्यागका प्रवेशलाई ११-८, ११-९ र ११-१० ले पराजित गरेसंगै खेल ६-६ को बराबरी अवस्थामा पुगेको थियो ।

निर्णायक तथा अन्तिम स्पर्धाका रुपमा रहेको महिला सिंगल्समा यलकी रविना महर्जन विरुद्ध स्ट्यागकी सुस्मिता खड्काले सुरुका २ सेटको नतिजा ११-८ र १२-१० ले आफ्नो पक्ष पारेपछि पुलिसलाई आवश्यक ८ अंक पुग्यो ।

लिगमा सेट १०-१० को बराबरी भएमा ‘गोल्डेन प्वाइन्ट’ का आधारमा सेटको नतिजा टुंगो लगाउने प्रावधान छ । फाइनल शनिवार हुनेछ ।