काठमाडौं (हाम्रो खेलकुद) – काठमाडौं स्पाइकर्सको तेस्रो जितसँगै मधेश युनाइटेड र गण्डकी थन्डर्स वात्सल्य एभरेष्ट महिला भलिबल लिग (इडब्लुभिएल) को लिग चरणबाटै बाहिरिएका छन् ।

काठमाडौंले बिहीवार मधेशमाथि ३–१ को सेटमा जित निकाल्दै फाइनल पुग्ने सम्भावना बलियो बनाउँदा मधेश १ खेल र गण्डकी २ खेल बाँकी छँदै लिग चरणबाटै बाहिरिएका हुन् ।

फाइनल पुग्ने सम्भावना कायम राख्न जितको खाँचो रहेपनि नतिजा आफ्नो पक्षमा पार्न नसक्दा मधेश बाहिरिन पुग्यो । मधेशले खेलेको सबै ४ खेलमा हार बेहोर्न पुग्यो । महिला राष्ट्रिय टोलीकी सदस्य निरुता ठगुन्ना मार्की खेलाडी रहेको मधेशले ४ खेलमा सेट जितेपनि अंकको खाता खोल्न सकेको छैन ।

यता, मधेशको हारसँगै गण्डकी पनि लिग चरणबाट बाहिरिन पुग्यो । गण्डकीले अब बाँकी दुवै खेलमा जित हात पारेपनि शीर्ष दुईमा रहने टोलीको अंकलाई भेट्टाउने छैन ।

गण्डकीकाे ३ खेलबाट १ अंक छ । बाँकी दुवै खेल जित्दा गण्डकीको ७ अंक मात्रै पुग्नेछ। यसअघि नै कर्णाली यस्विसको ३ खेलबाट ८ अंक छ । काठमाडौंको ४ खेलबाट ९ अंक पुगेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा मधेशले पहिलो सेट जत्दै राम्रो सुरुवात गरेपनि त्यही जितको लयलाई कायम राख्न सकेन । मधेशले त्यसपछिको तीनै सेट काठमाडौंलाई सुम्पियो । मधेशले पहिलो सेट २५–१५ ले सजिलै आफ्नो पक्षमा पारेको थियो । तर, त्यसपछि काठमाडौंले पूनरागमन जित निकाल्यो ।

दोस्रो सेट २५–२३ ले जित्दै खेलमा फर्किएको काठमाडौंले तेस्रो सेट २५–१५ ले आफ्नो पक्षमा पार्दै खेलमा अग्रता बनायो । तेस्रो सेट २५–१८ ले जित्दै काठमाडौंले लिगमा लगातार तेस्राे जित दर्ता गर्यो । पहिलो खेल गुमाएको काठमाडौंले त्यसपछिको सबै ३ खेल जितेको छ ।

आज नै दोस्रो खेलमा कर्णाली यस्विस र चितवन शक्ति तथा तेस्रो खेलमा ललितपुर क्वीन्स र गण्डकीबीच प्रतिस्पर्धा हुँदैछ । कर्णाली र चितवनलाई फाइनलमा स्थान बनाउन याे खेल निकै महत्वपुर्ण छ ।

नेपाली भलिबल इतिहासमै खेलाडी वर्गिकरणसहित पहिलोपटक भइरहेकेको इडब्लुभिएलमा ६ फ्रेन्चाइज टोलीको सहभागिता रहेको छ । लिगपछि शीर्ष दुईमा रहने टोलीले फाइनलमा स्थान बनाउनेछन् । फाइनल शनिवार हुनेछ ।