काठमाडौं (हाम्रो खेलकुद)- नेपालका नम्बर एक एमेच्योर गल्फर सदभाव आचार्यले २८औं संस्करणको फाल्डो जुनियर टुर युरोप ग्रान्ड फाइनल अन्तर्गत यु-२१ तर्फको उपाधि जितेका छन्।

नेपालले फाल्डो सिरिज ग्रान्ड फाइनलमा उपाधि जितेको यो पहिलो पटक हो। सदभाव ओभरअलतर्फ दोस्रो भए।
युएईको आबुधाबीस्थित अल आइन इक्वेसटेरियन सुटिङ एण्ड गल्फ क्लबमा भएको प्रतियोगिताको अन्तिम दिन बिहीवार १-अन्डर ६९ स्कोर गर्दा समग्रमा ५-अन्डर २०५ स्कोर गर्दै उपाधि जितेका हुन्।

उनले डेनमार्कका भिक्टोर कोफोड उसलेनलाई २ स्ट्रोकले हराउँदै पहिलो पटक नेपाललाई उपाधि दिलाएका हुन्। अन्तिम १८ होलको खेल सुरू गर्दा सदभाव भिक्टोरभन्दा २ स्ट्रोकले पछि थिए। तर भिक्टोरलाई माथ दिन सफल रहे।

४-पारको चौथौ होलमा इगल सट प्रहार गरे। यसपछि छैटौं र नवौं होलमा बोगी खेल्दै फ्रन्ट नाइन इभन-पार ३५ मा सकाए। यसपछि १३औं र१५औं होलमा एक-एक सट बचाए भने १४औं होलको बोगीले ब्याक नाइन १-अन्डर ३४ मा पुरा गरे।

उनले पहिलो दिन इभन-पार ७० र दोस्रो दिन ४-अन्डर ६६ मा खेल सकाएका थिए। डेनमार्कका भिक्टोर २ सय ७ सहित दोस्रो तथा स्वीडेनका विलियम सभान्सट्रोम र बेलायतका बेन बोल्टन संयुक्तरुपमा तेस्रो भए। उनीहरूले २सय ९ अंक जोडे।

यस्तै यु-१६ ब्वाइजमा नेपालका जयवीर आचार्य ११औं भए। यस्तै गल्स यु-१६ मा आइसटिना टण्डन नवौं स्थानमा रहिन्।

६ पटकका मेजर टाइटल विजेता सर निक फाल्डोले यो प्रतियोगिता आयोजना गरेका हुन्। यो प्रतिष्ठित जुनियर प्रतियोगिता आयोजनाका लागि आर एण्ड ए, डिपी वल्ड टुर र लेडिज युरोपियन टुरले सहयोग गरेको छ।

युएईमा युरोप, मिडल इस्ट, र एसियाबाट ७० जुनियर गल्फरले उपाधिका लागि प्रतिस्पर्धा गरेका थिए। गत अप्रिलमा नेपालमा भएको फाल्चो सिरिज नेपाल च्याम्पियनसिपमा सदभावले यु-२१ र ओभरअलतर्फ तथा जयवीर आचार्यले यु-१६ ब्वाइज र आइसटिना यु-१६ गल्सतर्फ पहिलो हुँदै ग्रान्ड फाइनलको लागि छनोट भएका थिए।

यो प्रतियोगिताबाट एमेच्योर गल्फ वरियतामा अंक जोडिने छ। साथै २०२५ को एसिया ग्रान्ड फाइनल, जुनियर दुबाई डेसर्ट क्लासिक र अनिका इनभिटेसनल युरोपको छनोट प्रतियोगिता पनि हो।