एजेन्सी – कमरान गुलामको शतकको सहयोगमा पाकिस्तानले तेस्रो ओडिआईमा घरेलु टोली जिम्बाब्वे हराउँदै सिरिज २-१ ले जितेको छ ।

बिहीवार तेस्रो ओडिआई खेल ९९ रनले जित्दै ३ खेलको ओडिआई सिरिज पाकिस्तानले जितेको छ । पहिलो खेल जिम्बाब्वेले जितेकोमा दोस्रो र तेस्रो खेलमा जित हात पार्दै पाकिस्तानले सिरिज जितेको हो । पाकिस्तानले दिएको ३ सय ४ रनको लक्ष्य पछ्याएको जिम्बाब्वे ४०.१ ओभरमा २ सय ४ रन जोड्दै अल आउट भयो ।

जिम्बाब्वेका लागि कप्तान क्रेग इर्भानले ६३ बलमा ५ चौका र १ छक्काको सहयोगमा सर्वाधिक ५१ रन जोडे । टाडिवानसि मुरामानी र सेन विलियम्सले समान २४ तथा सिकन्दर राजाले १६ रन जोडे । पाकिस्तानका लागि सइम अयुब, अबरार अहमद, हरिस रउफ र आमिर जमालले समान २ तथा फैसल अक्रमर र कमरान अकमलले समान १ विकेट लिए ।

त्यसअघि क्विन्स स्पोर्टस् क्लब बुलावायोमा टस जितेर पहिले ब्याटिङ गरेको पाकिस्तानले निर्धारित ५० ओभरमा ६ विकेट गुमाएर ३ सय ३ रन को योगफल तयार गरेको थियो । पाकिस्तानका लागि गुलामले सर्वाधिक १ सय ३ रनको इनिङ खेलेका थिए । उनले ९९ बलमा १० चौका र ४ छक्का प्रहार गरेका थिए ।

ओपनर अब्दुल्लाह शफिकले ६८ बलमा ५ चौका र १ छक्काको सहयोगमा ५० तथा अर्का ओपनर सइम अयुबले ३७ बलमा ३१ रन बनाए । कप्तान मोहम्मद रिजवानले ४७ बलमा ३७, सलमान आगाले ३० तथा तैयब ताहिरले नट आउट २९ रन जोडेका थिए । जिम्बाब्वेका लागि सिकन्दर राजा र रिचार्ड नगर्भाले समान २ तथा ब्लेसिङ मुजर्वानी र फराज अक्रमले समान १ विकेट लिए ।

पाकिस्तान र जिम्बाब्वेबीच आइतवारबाट ३ खेलको टि ट्वान्टी आई सिरिज सुरु हुनेछ ।