काठमाडौं(हाम्रो खेलकुद) – लुम्बिनीका कप्तान रोहितकुमार पौडेल र साद विन जाफरको अर्धशतकको सहयोगमा सिद्धार्थ बैंक नेपाल प्रिमियर लिगमा लुम्बिनी लायन्सले चितवन राइनोजलाई प्रतिस्पर्धात्मक लक्ष्य दिएको छ ।

टस हारेर ब्याटिङको निम्तो पाएको लुम्बिनीले निर्धारित २० ओभरमा ६ विकेट गुमाएर १ सय ६७ रनको प्रतिस्पर्धात्मक योगफल तयार गर्यो ।

लुम्बिनीका लागि कप्तान रोहितले सर्वाधिक ८० रन जोडे । उनले ६८ बलमा ६ चौका र ५ छक्का प्रहार गरे । प्रतियोगितामा आफ्नो दोस्रो अर्धशतक राेहितले ४३ बलमा पूरा गरेका थिए ।

रोहित एनपिएलमा दुई अर्धशतक पूरा गर्ने पहिलो नेपाली क्रिकेटर हुन् । रोहितले यसअघि पोखरा एभेन्जर्सविरुद्ध ९५ रन बनाएका थिए ।

रोहित २ सय ६१ रनका साथ सर्वाधिक रनकर्ताको शीर्ष स्थानमा छन् । पाँचौ विकेटका लागि कप्तान रोहितले साद विन जाफरसँग मिलेर १ सय १४ रनको शतकीय साझेदारी गरे । यो प्रतियोगितामा पाँचौ विकेटका लागि भएकाे सर्वाधिक रनको साझेदारी हो । प्रतियोगिताका चौथो शतकीय साझेदारी हो ।

रिजन ढकालले दोस्रो ओभरमा नै २ विकेट लिएर चितवनलाई सुरुवात देखि नै हाबी बनेको थियो । तर,राेहित र जाफरकाे शतकीय साझेदारीले लुम्बिनी खेलमा फर्किएकाे थियाे ।

जाफरले ३५ बलमा ५२ रन बनाए । उनले ४ चौका र १ छक्का प्रहार गरे । १०औं ओभरको अन्तिम बलमा साद विन जाफरले जीवनदान पाए । उनी कप्तान कुशल मल्लको बलमा सोहेल तन्भिरले सहज क्याच छोडेका थिए । जाफर त्यस समय ५ रनमा रहेका थिए ।

अर्जुन साउद १२ बलमा १५ रन बनाउँदै आउट हुँदा सन्दीप जोरा ४ रनमा नट आउट रहे ।

रिजनले दोस्रो ओभरको पहिलो बलमा आशुतोष घिरैयालाई १ रनमा बोल्ड आउट गराए । तेस्रो बलमा उनले उन्मुक्त चन्दलाई शुन्य रनमा विकेटकिपर विपिन रावलको हातबाट क्याच भए ।

आठौं ओभरको पहिलो बलमा कुशल बलमा टम मुर्सले जीवनदान पाएका थिए । मुर्सलाई रिजन ढकाल र जान निकोल लफ्टी इटनबीचको दुविधाको कारण क्याच मिस भएको थियो । त्यही ओभरको चौथो बलमा छक्का प्रहार गरेका मुर्स लगत्तैको बलमा फेरी छक्काको प्रयास गर्दा बाउन्ड्रीमा लफ्टीबाट नै क्याच भए ।

लुम्बिनीले चितवन सामू पावर प्लेमा २ विकेटमा ३३ रन बनाएको थियो । पाँचौं खेलसम्म आईपुग्दा चितवनले कुनै टोलीविरुद्ध ५० रनमाथीको रन खर्चिएको छैन । चितवनले पावर प्लेमा सुदूरपश्चिम रोयल्सविरुद्ध ३ विकेट लिदै सर्वाधिक ४८ रन खर्चिएको थियो ।

चितवनका लागि रिजन ढकालले २ तथा रञ्जित कुमार र कुशलले समान १ विकेट लिए । आज नै हुने दोस्रो खेलमा पोखरा एभेन्जर्सले कर्णाली याक्ससँग खेल्दैछ ।