काठमाडौँ (हाम्रो खेलकुद) – नेपाल राष्ट्रिय तथा अन्तर्राष्ट्रिय खेलाडी संघले एनएनआइपिए उत्कृष्ट बर्ष खेलाडी सम्मानमा ब्याडमिन्टनका अन्तर्राष्ट्रिय अम्पायर दीपक थापालाई पनि सम्मान गरेको छ । एनएनआइपिएले राजधानीमा मंगलबार आयोजित कार्यक्रममा थापालाई ब्याडमिन्टन खेलमार्फत देशको नाम अन्तर्राष्ट्रिय क्षेत्रमा उचो बनाउन भूमिका खेलेको भन्दै प्रशंसा पत्र प्रदान गरेको हो।
एसियाली ब्याडमिन्टनका सिनियर अम्पायर थापाले गत बर्ष ब्राजिलको रियो ओलम्पिकमा ब्याडमिन्टनमा लाइन जजको भूमिका निर्वाह गरेका थिए । एनएनआईपिएले अहिले सम्मको सफलताका लागि बधाई दिदै थापालाई भविष्यको सफलताको कामना समेत गरेको छ ।
राष्ट्रिय खेलकुद परिषद्का सदस्य सचिव केशवकुमार विष्ट, एनएनआइपिएका अध्यक्ष दीपक विष्ट र महासचिव दीपक श्रेष्ठले थापालाई सम्मान गरेका थिए । काठमाडौं जिल्ला ब्याडमिन्टनका अध्यक्ष समेत रहेका काठमाडौं थापागाँउका थापा नेपाल ब्याडमिन्टन संघका केन्द्रीय सदस्य पनि हुन् ।
एनआइएपिएले विभिन्न २२ खेलका खेलाडीलाई उत्कृष्ट खेलाडी तथा गिनिज अफ ओल्ड रेकर्डमा नाम लेखाउन सफल धावक हरिबहादुर रोकायालाई गजराज आदर्श खेल व्यक्तित्वबाट सम्मान गरेको थियो ।
