सिड्नी (हाम्रो खेलकुद) – नेपाली राष्ट्रिय बिच भलिबलका सफल मानबहादुर श्रेष्ठ र दिल बहादुर सुनारको जोडी अस्ट्रेलियामा भएको ब्राइटन बिच भलिबल कपको च्याम्पियन बनेका छन् ।

ब्राइटन बिच भलिबल संघको आयोजनामा आइतबार भएको फाइनलमा आयाेजक ब्राइटनका जाेडीलाई २–० को सोझो सेटमा पराजित गर्दै उपाधि जित्न सफल भएको हो ।

सिड्नीस्थित ब्राइटन बिचमा रोमाञ्चक र प्रतिस्पर्धात्मक बनेको पहिलो सेट अस्ट्रेलियाको रकडेलमा रहेको निकै नै चर्चित नमस्ते ज्वेलर्स सिड्नीबाट प्रतिनिधित्व गरेका मान र दिलको जोडीले २८–२६ ले आफ्नो पक्षमा पार्न सफल भयो । त्यसपछि यो जोडीले दोस्रो सेट २१–१९ ले जित्दै उपाधि जित्न सफल भयो ।

च्याम्पियन बन्ने क्रममा मान र दिलको जोडीले कुल ७ खेल खेलेको थियो । उपाधिसँगै मान र दिलको जोडीले अस्ट्रेलियन डलर प्राप्त गरेको छ ।

उपाधि जितेपछि मान बहादुरले खेल्ने अवसर दिने नमस्ते ज्वेलर्सका कृष्ण सुनारलाई धन्यवाद प्रदान गरे । दिलले अस्ट्रेलिया आएको एक वर्षपछि बिच भलिबल खेल्न पाउदा खुशी लागेको र साथ, सहयोग गर्ने सबैलाई धन्यवाद ज्ञापन गरे ।

गत साता नै हुनुपर्ने प्रतियोगिता अत्यधिक वर्षापछि एक सातापछि सारिएको थियो । एक दिने प्रतियोेगिता सिड्नीस्थित ब्राइटन बिचमा एकसाथ विभिन्न ५ वटा कोर्टहरुमा सञ्चालन भएको थियो ।

नमस्ते ज्वेलर्सका कृष्ण सुनार खेलप्रति रुची राख्ने समाजसेवी व्यक्तित्व हुन् । उनले अस्ट्रेलियामा आयोजना हुने विभिन्न खेल प्रतियोगिताहरुमा प्रायोजन गर्दै आइरहेका छन् ।

मान र दिल नेपाली राष्ट्रिय बिच भलिबल टोलीका सफल जोडी हुन् । यो जोडीले ऐतिहासिक रजत पदक जितेका छन् । यो जोडीले सन् २०२२ मा बंगलादेशमा भएको एसियन सेन्ट्रल जोन सिनियर पुरुष र महिला बिच भलिबल च्याम्पियनसिपमा रजत तथा सन् २०२४ मा भुटानमा भएको काभा बिच भलिबल च्याम्पियनसिपमा पनि रजत पदक जित्न सफल भएका थिए ।

मान र दिल पछिल्लो एक वर्ष यता अस्ट्रेलियाम रहेर नेपाली समुदायले आयोजना गर्ने विभिन्न भलिबल प्रतियोगितामा निरन्तर सहभागिता जनाउदै आइरहेका छन् । मान बहादुरले पोखरा भलिबल क्लबबाट तथा दिलले गल्कोट समाज अस्ट्रेलियाबाट प्रतिनिधित्व गर्दै आइरहेका छन् ।

नेपाल भलिबल संघ अस्ट्रेलियाको वर्ष उत्कृष्ट स्पाइकर बनेका दिलले आफ्नो टोलीलाई एकपटक तोरनल्ह भलिबल रनिङ कप २०२५ को उपाधि जिताइसकेका छन् । मान बहादुरले गत जुनमा भएको मोना कप भलिबलमा आफ्नो टोली पोखरालाई उपविजेता बनाउन सफल भएको थियो ।