सिड्नी – अस्ट्रेलियाको मेलबर्नमा सर्वाधिक धनराशीको पुरुष भलिबल प्रतियोगता ‘आइएक्सेल खुल्ला भलिबल कप २०२५’ अर्काे साता हुने भएको छ ।

एलिट गोर्खा स्पोट्र्स क्लबको आयोजना तथा आइएक्सेल एजुकेशन, भिषा एण्ड माइग्रेसनको मुख्य प्रायोजनमा अस्ट्रेलियाकै सर्वाधिक धनराशिको एक दिने खुल्ला पुरुष भलिबल कप २० सेप्टेम्वर (असोज ४ गते शनिबार) हुन लागेको हो ।

एक दिने प्रतियोगिता मेलबर्नस्थित डारेविन कम्युनिटी स्टेडियमको कभर्डहलमा हुनेछ । यो अस्ट्रेलियाको हालसम्मकै सर्वाधिक धनराशीको प्रतियोगिता हो ।

भलिबल कपको विजेताले ५ हजार १ सय अस्ट्रेलियन डलरसहित ट्रफी, मेडल र प्रमाणपत्र प्राप्त गर्नेछ । दोस्रो हुने टोलीलाई २ हजार ५ सय अस्ट्रेलियन डलरसहित ट्रफी, मेडल र प्रमाणपत्र प्रदान गरिनेछ ।

गत वर्ष विजेताले ५ हजार तथा दोस्रो भएको टोलीले २ हजार २ सय डलर प्राप्त गरेको थियो । सर्वाेत्कृष्ट खेलाडी र विधागतका उत्कृष्टहरुलाई नगद र ट्रफीसँगै गिफ्ट ह्याम्पर प्रदान गरिने आयोजकले जनाएको छ ।

नकआउटको आधारमा हुने प्रतियोगितामा सिड्नीको ९ र मेलबर्नका २ गरी ११ टोलीको सहभागिता रहेको छ । सहभागी टोलीलाई आइतबारै दुई समूहमा विभाजन गरि खेल तालिका सार्वजनिक गरिएको छ ।

पोल ‘ए’ मा छन्त्याल परिवार अस्ट्रेलिया, म्याग्दी जलजला परिवार अस्ट्रेलिया, हाम्रो सी, आयोजक एलिट गोर्खा डाँफे, मोना अस्ट्रेलिया र गल्कोट समाज अस्ट्रेलिया रहेका छन् ।

पोल ‘बी’ मा ढोरपाटन क्लब अस्ट्रेलिया, आयोजक एलिट गोर्खा मुनाल, पोखरा भलिबल क्लब, दि गोर्खा स्पोर्ट्स क्लब सिड्नी र म्याग्दी काली युनाइटेड रहेका छन् ।

यस प्रतियोगितामा नेपाली राष्ट्रिय भलिबल टोलीका पुर्व कप्तान मानबहादुर श्रेष्ठसँगै टेकराज अवस्थी, बिशाल बहादुर बिक, हेमन्त बहादुर मल्ल, लोकेन्द्र गिरी, राजेन्द्र विष्ट, दिल बहादुर सुनार, रविन चन्द ठकुरी, बसन्त जोशी र रमेश बिक लगायतका राष्ट्रिय खेलाडीले खेल्नेछन् ।

गत वर्ष म्याग्दी कालीले उपाधि जितेको थियो । त्यसबेला म्याग्दी कालीबाट मान बहादुर र टेकराजसँगै खेलेका थिए । नेपाल भलिबल संघ अस्ट्रेलियाले राष्ट्रिय टोलीका दुई खेलाडीलाई एकै टोलीमा राख्न नपाउने नियम राखेको छ ।

प्रतियोगितालाई बेटर चोइस मोर्टगेज एण्ड फाइनान्स, वल्ड दरवार, मन्त्र प्लम्बिङ, भिआइसी कङ्क्रिट, नेपा पिटिवाई एलटिडी, केटिएम ट्राभल्स, सब्लिम एकाउन्टेन्टस्, जाभा इनर्जी र कटिङ किङले प्रायोजन गरेको छ ।