काठमाडौं (हाम्रो खेलकुद)- नेपाल साफ यु-१७ च्याम्पियनसिपको सेमिफाइनलमा चिर प्रतिद्वन्दी भारतसँग पराजित भएको छ। नेपाललाई ६ पटकको च्याम्पियन भारतले ३-० ल हराएको छ ।

श्रीलंकाको कोलोम्बोमा भएको खेलको पहिलो हाफमा नेपालले भारतलाई गोल गर्न रोक्यो। तर दोस्रो हाफमा नेपालको डिफेन्स लाइन तोड्दै भारत गोल गर्न सफल रहयो।

खेलको ६१ औं मिनेटमा भारतले अग्रता बनायो। कप्तान डेनी सिंह वाङ्खेमले दिएको थ्रु-पास डलालमाउन गाङ्ग्टेको खुट्टामा लागेर गएको बलमस गुनलेबा वाङ्खेराकपामले सही दिशा दिए।

१-० ले पछि परेको नेपाल खेलमा फर्कन सकेन । ८० औं मिनेटमा भारतले नेपालको कमजोर डिफेन्सको फाइदा उठाउँदै गोल गर्यो।

अजलान शाहले नेपालका कप्तान प्रशान्त मोक्तानलाई छल्लाउँदै बकमस भित्रबाट हानेको लेफ्न फुटेट सट आकर्षक गोलमा परिणत भयो।

भारत यतिमा मात्र रोकिएन। इन्ज्युरी समयमा गुनलेबा वाङ्खेराकपामको सटिक पासमा सबस्टिच्युट खेलाडी डाइमन्मड सिंहले गोल गरे। यो सँगै नेपाललाई ३-० ले माथ दिंदै भारत फाइनलमा पुगेको छ।

समूह चरणमा नेपालले श्रीलंकालाई २-० ले हराउँदा बंगलादेशसँग ४-० ले हारेको थियो। नेपाल समूह उप विजेता बन्दै सेमिफाइनलमा पुगेको थियो।‌

भारतले अब उपाधिका लागि बंगलादेशसँग खेल्नेछ। बंगलादेश आज सेमिफाइनलमा पाकिस्तानलाई २-० ले हराएको थियो। भारत सातौं र बंगलादेश चौथो पटक उपाधि जित्ने दाउमा रहनेछ।

यसअघिको ९ संस्करणमा भारतले ६, बंगलादेशले २ र पाकिस्तानले एक पटक उपाधि जितेका छन्। सन् २०११ बाट सुरु भएको च्याम्पियन्स कहिले यु १५ र कहिले यु १६ का रुपमा पनि‌ आयोजना भएको छ। योसहित ३ संस्करण लगातार यु १७ को नाममा आयोजना भएको छ।

एक पटक पनि उपाधि जित्न नसकेको नेपाल यो पटक पनि सेमिफाइनलमा नै रोकिएको छ।‌