भुपेन्द्र जि.सी.

आइसिसी टी ट्वान्टी विश्वकप एसिया तथा इएपी छनोट ओमानको मस्कटमा बुधवार सुरु हुँदैछ । ९ देश सहभागी प्रतियोगिता शीर्ष ३ टोली आगमी वर्ष भारत र श्रीलंकामा हुने टि ट्वान्टी विश्वकप खेल्न पाउनेछन् ।

समूह ‘ए’ मा मलेसिया, कतार र युएई छन् । समूह ‘बी’ मा नेपाल, जापान र कुवेत छन् । समूह ‘सी’ मा ओमान, पपुवा न्युगिनी र सामोआ छन् । हरेक समूहबाट शीर्ष दुई टोली सुपर सिक्समा पुग्नेछन् । सुपर सिक्समा अर्को समूहबाट आएका ४ टोलीसँग प्रतिस्पर्धा हुनेछ ।

आफ्नो समूहबाट गएको टोलीसँग भने सुपर सिक्समा प्रतिस्पर्धा हुनेछैन । त्यसैले सुपर सिक्समा हरेक टोली दुई अंकका साथ जान चाहनेछन् । दुई अंकका साथ जाने तीन टोलीलाई अतिरिक्त फाइदा हुनेछ ।

विश्वकपमा पुग्न कुनैपनि टोलीले मैदानमा उत्कृष्ट प्रदर्शन गर्नुपर्ने हुन्छ । अझ टी ट्वान्टीमा एकै ओभरले खेल मोडिन सक्छ । कागजी रुपमा जति मजबुत भएपनि जित्नलाई खेलको समयमा राम्रो क्रिकेट खेल्नै पर्ने हुन्छ ।

पछिल्लो समय टी ट्वान्टी क्रिकेटमा सबै एसोसिएट टोलीले आफ्नो स्तर लगातार सुधार गरेको हुँदा छनोटमा कडा प्रतिस्पर्धा अनुमान गरिएको छ ।

तर अन्य टोलीको तुलनामा नेपाल यस प्रतियोगितामा सर्वाधिक मजबुत टोली देखिएको छ । कागजी रुपमा मात्रै होईन अन्य तुलनामा पनि नेपाल अघि छ । नेपालले शीर्ष तीनमा रहेर विश्वकप खेल्ने पाँच बलिया आधार यस प्रकार छन् ।

५. विश्वकपमा पुग्न नयाँ समिकरण हुनु

यसअघि एसिया क्षेत्रबाट फाइनलमा पुग्ने दुई टोली मात्रै टि ट्वान्टी विश्वकप खेल्न पाउथे । सेमिफाइनलको एक हार विश्वकप खेल्ने सपना समाप्त गर्ने गर्दथ्यो । सन् २०२२ मा नेपालले समूह चरणमा सबै खेल जितेपनि सेमिफाइनलमा युएईसँग हारेर विश्वकप खेल्न पाएको थिएन । २०२३ मा सेमिफाइनलमा युएईलाई नै हराउँदै विश्वकप खेलेको थियो ।

तर यस पटक इएपी छनोटपनि एसियामै जोडेपछि एसिया क्षेत्र छनोटबाट तीन टोली विश्वकपमा जानेछन् । नकआउट खेल नहुँदा एक वा दुई खेल हारेको खण्डमा पनि विश्वकप सम्भावना रहन्छ ।

नेपालले समूह चरणमा दुई र सुपर सिक्समा चार गरी कुल ६ खेल खेल्नेछ । एक खेल हारेको खण्डमा पनि नेपाललाई खेलमा फर्किन पर्याप्त समय हुनेछ । त्यसैले ३ टोलीको कोटा हुनुले नेपाललाई विश्वकपमा पुग्न सहज देखिन्छ ।

४. ओमानको कन्डिसनबारे जानकार खेलाडी

कन्डिसनबारे जानकार नभए उत्कृष्ट क्षमता भएका खेलाडीले पनि मैदानमा राम्रो प्रदर्शन गर्न सक्दैनन् । नेपालले घरेलु मैदान टियु बाहेक बाहिर गएर रन बनाउन नसक्नुको मुख्य कारण नै कन्डिसन रहँदै आएको थियो । नेपालको हारको मुख्य कारण लगभग प्राय ब्याटिङ कमजोरी नै हो ।

तर यस पटक कन्डिसन नेपाललाई बाधक नहुने देखिन्छ । किनभने नेपालले शारजाहमा वेष्ट इण्डिजसँग तीन खेल खेलेर गएको छ । शारजाह र ओमानको कन्डिसन लगभग उस्तै छ । त्यसैले विश्वकप छनोट हुने मस्कटमा रहेको ओमान क्रिकेट एकेडेमी १ र २ बारे नेपाली खेलाडीलाई राम्रो जानकारी छ ।

सन् २०२१ यता नेपालले ओमानमा आइसिसी विश्वकप लिग–२, पपुवा न्युगिनीसँग दुई ओडीआई खेल (२०२१), चार देशसम्मिलित टि ट्वान्टी सिरिज, विश्वकप एसिया क्षेत्र छनोट(२०२२) र एसिसी टि ट्वान्टी इमर्जिङ एसिया कप (२०२४) खेलेको छ ।

यस पटक पनि विश्वकप छनोट भन्दा एक साता अघिनै गएर दुई अभ्यास खेल खेलि सकेको छ । पिच र मौसम बारे राम्रो जानकार हुँदा नेपाल राम्रो रणनीतिका साथ मैदान उत्रनेछ । त्यसको नतिजा मैदानमा राम्रो क्रिकेट खेल्न सहज हुनेछ ।

३. उत्कृष्ट ब्याटिङ र सन्तुलित बलिङ आक्रामण

यस प्रतियोगितामा सर्वाधिक सन्तुलित र बलियो टोली नेपाल देखिन्छ । अझ नेपालको ब्याटिङलाइनअप वेष्टइण्डिजले टी ट्वान्टी विश्वकप उपाधि जित्दा (२०१२-२०१६) को समयलाई झल्को दिने खालकोछ । यस किसिमको ब्याटिङ लाइनअप एसोसिएट होइन टेस्ट टोलीमै पाउन मुश्किल पर्दछ ।

नेपालको प्लेइङ ११ मा नौ नम्बरसम्म ब्याटिङमा आउने ब्याटरले खेल जिताउन सक्ने खुबी राख्ने हुँदा कुनैपनि खराब अवस्थाबाट राम्रो योगफल बनाउन र पूरा गर्न सक्छ ।

नेपालको घोषणा १५ सदस्य टोलीमा सन्दीप लामिछाने र ललितनारायण राजवंशी बाहेक अन्य सबै खेलाडीले कुनैपनि नम्बरमा गएर नेपाललाई जिताउन सक्छन् । अन्य टोली जस्तो सिमित ब्याटरमा नेपाल निर्भर छैन । नेपालको शीर्षक्रम नचले मध्यक्रमले राम्रो गर्नसक्छ । शीर्ष र मध्यक्रम राम्रो नगरे तल्लोक्रमका खेलाडीले राम्रो गर्न सक्छन् ।

अर्कोतर्फ नेपालको ब्याटिङमा कुशल मल्ल, कुशल भुर्तेल, दीपेन्द्रसिंह ऐरी, गुल्शन झा, आदिल आलम, लोकेश बम र करण केसी जस्ता टि ट्वान्टी हिटर छन् । नेपालले सुरुआत देखिनै विष्फोटक ब्याटिङ गर्न सक्छ । एउटा आउट हुँदैमा रोकिने सम्भावना रहदैन । अर्कोतर्फ नेपालको बलिङमा सन्दीप लामिछाने जस्ता विश्वस्तरिय स्पिनरमा छन् ।

करण , सोमपाल कामी र नन्दन यादव तीव्र गतिका बलर छन् । पार्ट टाइममा दुई कुशल र दीपेन्द्र छन् । नेपालको बलिङमा ७/८ बलरको विकल्प रहन्छ । एउटाले राम्रो नगर्दा अर्को विकल्प छ ।

अर्कोतर्फ टोलीमा प्लेइङ–११ मा पर्न कडा प्रतिस्पर्धा हुँदा खेलाडीले अझै राम्रा प्रदर्शन गर्न सक्छन् । ब्याटिङ र बलिङ दुबैमा टि ट्वान्टी खेलाडीको बाहुल्यता छ । खराब लयमा भएका खेलाडीले छनोट अघि राम्रो प्रदर्शन गरेका छन् । त्यसैले नेपालले विश्वकप खेल्ने सम्भावना मजबुत बनेको छ ।

२. उच्च मनोबल

क्रिकेट भनेको नै मनोबलको खेल हो । नेपाली खेलाडीको वर्तमान मनोबल टेस्ट ठूला टोलीलाई पनि स्तब्ध पार्न सकिन्छ भन्नेछ । उक्त मनोबलले मैदानमा नेपालले राज गर्ने सम्भावना देखिनछ । अघिल्लो साता वेष्ट इण्डिजलाई ३ खेलको सिरिजमा नेपालले २-१ ले जितेको थियो ।

दुई पटकको टि ट्वान्टी च्याम्पियन वेष्टइण्डिजलाई हराएको हुँदा खेलाडीको मनोबल नै उच्च छ । छनोटअघि बलियो टोलीसँग सिरिज खेलेको हुँदा नेपालले आफ्नो कमजोरी सुधार गर्ने अवसर पनि पाएको छ । त्यसैले खेलाडीले कुनैपनि देशविरुद्ध उत्कृष्ट प्रदर्शन गर्न सक्छन् ।

अर्कोतर्फ पछिल्लो दुई वर्षमा नेपालले ठूला टोली भारत, दक्षिण अफ्रिका र बंगलादेशलाई कडा प्रतिस्पर्धा दिएको थियो ।

यसअघिका छनोटमा जस्तो सेमिफाइनल वा महत्वपूर्ण खेलमा यो वा त्यो टोली नपरे हुन्थ्यो भन्ने मनोबलमा नेपाली खेलाडी छैनन् । नेपाली खेलाडी जुनसुकै टोलीलाई पनि हराउन सकिन्छ भन्ने सोचमा हुँदा जित निकाल्न सहज देखिन्छ ।

१.लगातार एकै टोली हुनु

सन् २०२३ मा रोहित पौडेल कप्तान बनेपछि नेपालले आफ्नो अन्तिम १५ सदस्य टोलीमा एक दुई खेलाडी परिवर्तन गर्दै आएको छ । गतवर्ष विश्वकप खेलेका-११ खेलाडी यस पटक छनोटमा छन् । विश्व कपमा नपरेका आरिफ शेख, लोकेश , नन्दन र आदिल छन् । आदिल बाहेक अन्य सबै खेलाडीले राम्रो खेलको अनुभव पाएका छन् ।

सबै खेलाडीले अन्तर्राष्ट्रिय राम्रो खेलको अनुभव पाएका छन् । राम्रो प्रदर्शनको लागि खेलाडीको क्षमता मात्रै भएर हुँदैन । टोलीको सन्तुलन, एकअर्कापतिको खेल, विश्वास, एकता, आत्माविश्वास सबै थाहा हुनुपर्छ । दुई वर्षदेखि एउटै खेलाडी लगातार खेलेको हुँदा नेपाललाई आफ्नो रणनीति बनाउन कठिन हुनेछैन ।

अर्कोतर्फ एउटा खेलाडीले राम्रो नगर्दा त्यसको राम्रो विकल्प पनि तयार पारेको छ । पर्याप्त अन्तर्राष्ट्रिय खेल खेल्न पाएका छन् । यसअघि जस्तो खेलको कमी खेलाडीलाई छैन । खेलाडीले आफ्नो कमजोरीमा राम्रोसँग काम गरेर छनोट खेल्न गएका छन् । त्यसैको कारण नेपाल विश्वकपमा पुग्ने बलियो सम्भावना देखिन्छ ।